टेलिव्हिजनवरील ‘रामायण’ या मालिकेत राम आणि सीतेची भूमिका साकारणारे कलाकार गुरमीत चौधरी आणि डेबिना बॅनर्जी यांच्या घरात चोरी झाली. त्यांच्या घरातील नोकरानेच ही चोरी केली आहे. सुदैवाने गुरमीत त्यावेळी घरी होता. त्याची दोन्ही मुलं आणि इतर कुटुंबीय सुरक्षित असल्याची माहिती त्याने दिली. चोराला पकडलं गेलं असून चोरीला गेलेलं काही सामान परत मिळवण्यातही पोलिसांना यश आलं आहे. गुरमीतने सोशल मीडियावर पोस्ट लिहित या घटनेची सविस्तर माहिती दिली.
गुरमीत चौधरीने त्याच्या इन्स्टाग्राम स्टोरीमध्ये लिहिलं, ‘अलर्ट- आज एका नवीन वर्करने (नोकर) आपल्या घरातून काही सामानाची चोरी केली आणि तो पळून गेला. सुदैवाने आम्ही कोणालाही कामावर ठेवताना त्यांची नीट चौकशी करतो. त्यामुळे आम्ही लगेच कारवाई करू शकलो. नशिबाने मी तेव्हा घरातच होतो आणि माझी मुलं त्यांच्या रुममध्ये सुरक्षित आहेत. काही कॉल्स केल्यानंतर आम्हाला चोरीला गेलेलं बरंचसं सामान परत मिळालं. पण सर्वांत महत्त्वाची गोष्ट म्हणजे आम्ही सर्वजण सुरक्षित आहोत. थोडं नशिब खराब होतं, पण एक गोष्ट नीट लक्षात ठेवा की, तुम्हाला घरातसुद्धा नेहमीच अलर्ट राहावं लागेल. आपल्या घरात कोणालाही कामावर ठेवण्याआधी त्या व्यक्तीची नीट चौकशी करा.’
गुरमीत आणि डेबिनाने काही महिन्यांपूर्वीच मुंबईत एक नवीन घर खरेदी केलं होतं. त्यांनी सोशल मीडियावर आपल्या नव्या घराची आणि गृहप्रवेशाची झलकसुद्धा दाखवली होती. या घराची किंमत कोट्यवधींमध्ये असल्याचं कळतंय. गुरमीत आणि डेबिना हे राम-सीतेच्या भूमिकेतून घराघरात पोहोचले. याच मालिकेदरम्यान दोघं एकमेकांच्या प्रेमात पडले आणि 2011 मध्ये त्यांनी लग्न केलं.
डेबिनाने एप्रिल 2022 मध्ये मुलगी लियानाला जन्म दिला. त्यानंतर त्याच वर्षी नोव्हेंबर महिन्यात दिविशा या दुसऱ्या मुलीचा जन्म झाला. 2009 मध्ये या दोघांनी ‘रामायण’ या मालिकेत एकत्र काम केलं होतं. हे दोघं लवकरच ‘पती पत्नी और पंगा- जोडियों की रिॲलिटी’ या नव्या टीव्ही शोमध्ये एकत्र झळकणार आहेत. गेल्या महिन्यातच या शोची घोषणा कलर्स टीव्हीने केली होती. डेबिनाची दुसरी गर्भधारणा ही नैसर्गिक पद्धतीने झाली असली तरी दिविशाचा जन्म डिलिव्हरीच्या तारखेआधी झाला होता. त्यामुळे तिला रुग्णालयात काही दिवस दाखल करण्यात आलं होतं.
About The Author
Comment List