मुख्य न्यायमूर्ती आराधे, न्या. पांचोली यांची अखेर सर्वोच्च न्यायालयात नियुक्ती

मुंबई उच्च न्यायालयाचे मुख्य न्यायमूर्ती आलोक आराधे आणि पाटणा उच्च न्यायालयाचे मुख्य न्यायमूर्ती विपुल पांचोली यांची अखेर सर्वोच्च न्यायालयाच्या न्यायमूर्तीपदी नियुक्ती करण्यात आली आहे. न्यायवृंदाने (कॉ लेजियम) बढतीची शिफारस केल्यानंतर दोन दिवसांनी केंद्र ससकारने ही नियुक्ती आज जाहीर केली.

या नियुक्तीची माहिती केंद्रीय कायदामंत्री अर्जुन राम मेघवाल यांनी ‘एक्स’च्या माध्यमातून दिली आहे. संविधानाने दिलेल्या अधिकाराचा वापर करत राष्ट्रपती आणि सरन्यायाधांनी सल्लामसलत केल्यानंतर आलोक आराधे व विपुल मनुभाई पांचोली यांची सर्वोच्च न्यायमूर्ती म्हणून नियुक्ती केल्याचे मेघवाल यांनी म्हटले आहे.

प्रादेशिक असमतोल; पांचोली यांच्या नियुक्तीला न्या. नागरत्न यांचा आक्षेप

न्यायमूर्ती पांचोली यांच्या नियुक्तीला न्यायवृंदाने एकमताने सहमती दर्शवली नव्हती. सरन्यायाधीश भूषण गवई हे अध्यक्ष असलेल्या पाच सदस्यांच्या न्यायवृंदातील न्यायमूर्ती बी. व्ही. नागरत्न यांनी पांचोली यांच्या नियुक्तीला आक्षेप घेतला आणि विरोध करण्यासाठी त्यांनी पत्रही लिहिले होते. पांचोली यांच्या नियुक्तीमुळे ज्येष्ठता आणि प्रादेशिक प्रतिनिधीत्वात असमतोल होत असल्याचे न्या. नागरत्न यांनी पत्रात म्हटले होते. दरम्यान, पांचोली यांच्या नियुक्तींमुळे गुजरात उच्च न्यायालयातून सुप्रीम कोर्टात आलेल्या न्यायमूर्तीची संख्या तीन झाली आहे.

कोण आहेत न्या. पांचोली?

गुजरात येथे जन्मलेले न्यायमूर्ती विपुल पांचोली यांनी १९९१ मध्ये वकिलीच्या कारकिर्दीला सुरुवात केली. गुजरात उच्च न्यायालयात अनेक वर्षे वकिली केल्यानंतर २०१४ मध्ये त्यांची उच्च न्यायालयात अतिरिक्त न्यायमूर्ती म्हणून नियुक्ती झाली. २०१६ मध्ये ते कायमस्वरूपी न्यायमूर्ती झाले. सध्या ते पाटणा उच्च न्यायालयाचे मुख्य न्यायमूर्ती आहेत.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.