हिंदुस्थानने संरक्षण क्षेत्रात एक मोठी कामगिरी केली आहे. शुक्रवारी (25 जुलै) एका क्षेपणास्त्राची यशस्वी चाचणी घेण्यात आली. संरक्षण मंत्री राजनाथ सिंह यांनी सोशल मीडियावर पोस्ट करून म्हटले आहे की, संरक्षण क्षेत्रात हिंदुस्थानसाठी ही आणखी एक मोठी कामगिरी आहे. आंध्र प्रदेशातील कुरनूल येथील नॅशनल ओपन रेंज (NOAR) येथे या क्षेपणास्त्राची यशस्वी चाचणी घेण्यात आली आहे.
राजनाथ सिंह यांनी पोस्टमध्ये लिहिले आहे की, ‘हिंदुस्थानच्या संरक्षण क्षमतेला मोठी चालना देत, DRDO ने आंध्र प्रदेशातील कुरनूल येथील नॅशनल ओपन एरिया रेंज (NOAR) येथे मानवरहित हवाई वाहन प्रिसिजन क्षेपणास्त्र (ULPGM)-V3 ची यशस्वी चाचणी केली.’
ULPGM-V3 हा एक विस्तारित श्रेणीचा प्रकार आहे, ज्याला ULM-ER असेही म्हणतात. 10-14 फेब्रुवारी रोजी बेंगळुरू येथे झालेल्या एरो इंडिया मध्ये देखील त्याचे प्रदर्शन करण्यात आले. अदानी आणि भारत डायनॅमिक्स लिमिटेड (BDL) यांनी ULPGM V3 ची निर्मिती केली आहे तर DRDO कडे त्याचा विकास आणि चाचणी करण्याची जबाबदारी आहे. ULPGM चे तीन प्रकार आहेत, ULPGM V1, ULPGM V2 आणि ULPGM V3. या तिघांमधील मुख्य फरक म्हणजे त्यांची कामगिरी आणि श्रेणी.
डीआरडीओच्या वेबसाइटवर, जेन्स न्यूजने सांगितले आहे की, हे एक हवेतून पृष्ठभागावर मारा करणारे क्षेपणास्त्र आहे. जे रात्री आणि दिवसा दोन्ही ऑपरेशन्समध्ये वापरले जाऊ शकते. तसेच हे फायर-अँड-फॉरगेट क्षेपणास्त्र 12.5 किलो वजनाचे आहे. हे एका लहान ड्युअलथ्रस्ट प्रोपल्शन युनिटद्वारे चालवले जाते. दिवसा त्याची रेंज 4 किमी पर्यंत असून रात्री ते 2.5 किमी पर्यंत रेंज असणार आहे. हे क्षेपणास्त्र अशा प्रकारे डिझाइन केले आहे की, विविध वॉरहेड्स आणि दारूगोळा वापरता येईल.
Comment List