>> पुणे, क्रीडा प्रतिनिधी
पक्षचोरी करून महाराष्ट्राच्या सत्तेत घटनाबाह्य सरकार बसलेले असतानाच, महाराष्ट्र ऑलिम्पिक असोसिएशनच्या (एमओए) यंदाच्या (२०२५-२९) निवडणुकीतही असाच घटनाबाह्य प्रकार बघायला मिळाला आहे. चक्क निवडणुकीच्या दिवशी कुठलेही मतदान न होता, निवडणूक प्रक्रियाच गुंडाळण्याचा अजब प्रकार २ ऑक्टोबरला बघायला मिळाला. आता याच घटनाबाह्य ‘एमओए’चे पुन्हा नव्याने अध्यक्ष झालेल्या अजित पवार यांनी येत्या रविवारी (दि.२३) संघटनेची वार्षिक सर्वसाधारण सभा बोलावली आहे. मात्र, ‘एमओए’ची ही वार्षिक सर्वसाधारण सभाच बेकायदा असून, लवकरच कोर्टाच्या आदेशानुसार नवीन निवडणूक प्रक्रिया राबवावी लागणार असल्याचे महाराष्ट्र सायकलिंग असोसिएशनचे सचिव सूर्यकांत पवार यांनी पत्रकार परिषदेत सांगितले. ‘एमओए’ची निवडणूक किती हश्यास्पद आणि मनमानी पद्धतीने झाली आहे, याची पोलखोलच त्यांनी धर्मदार आयुक्तांनी दिलेल्या निकालाची प्रत सादर करुन केली.
राजकिय दबाव अन् क्रीडा खात्याचा वरदहस्त
मंगळवारी झालेल्या या पत्रकार परिषदेसाठी सूर्यकांत पवार यांच्यासह महाराष्ट्र सायकलिंग असोसिएशनचे अध्यक्ष लालूभाई शेख, हॉकी महाराष्ट्राचे सहसचिव रणवीर सिंग, महाराष्ट्र जलतरण संघटनेचे राजेंद्र पालकर आदी मान्यवर उपस्थित होते. ‘घटनाबाह्य पद्धतीने चौथ्यांदा ‘एमओए’चे अध्यक्ष बनलेल्या अजित पवार यांनी घटनेत नसलेल्या वरिष्ठ उपाध्यक्षपती केंद्रीय राज्यमंत्री मुरलीधल मोहोळ यांची निवड केली असून, संघटनेच्या संकेतस्थळावर त्यांनी आपली नवी कार्यकारिणी आणि पदाधिकार्‍यांची निवडही जाहीर केली आहे’, असे सूर्यकांत पवार यांनी सांगितले. ते म्हणाले, ‘प्रचंड राजकिय दबाव आणि शासकीय क्रीडा खात्याच्या वरदहस्तामुळे ‘एमओए’मध्ये गेल्या १०-१२ वर्षांपासून नुसता आर्थिक भ्रष्टाचाराचा धुमाकूळ सुरू आहे. धर्मदाय आयुक्तांनी ‘एमओए’चा २०२१ ते २०२५चा बदल अर्ज (चेंज रिपोट) फेटाळला असल्याने या पदाधिकार्‍यांना निवडणूक घेण्याचा अधिकारच उरत नाही, असेही पवार यांनी निदर्शनास आणून दिले. एवढेच नाही, तर २०१३पासूनचा बदल अर्ज अमान्य झाल्याने त्यानंतर ‘एमओए’मध्ये नव्याने समाविष्ठ केलेल्या राज्य संघटनाही बेकायदा आहेत, असेही त्यांनी सांगितले.
आम्हाला राजकीय नेत्यांची गरज, पण..
महाराष्ट्र ऑलिम्पिक असोसिएशनला (एमओए) निधी मिळवून देण्यासाठी राजकीय नेत्यांची नक्कीच गरज असते. त्यांनी संघटनेच्या पदावरही काम करायला हरकत नाही. मात्र, क्रीडा लवाद आणि ‘एमओए’च्या घटनेच्या चौकटीतच त्यांनी काम करायला हवे. क्रीडा लवादानुसार दोन टर्मपर्यंतच संघटनेच्या पदावर राहता येते. मात्र, अजित पवार यांनी घटनेच्या नियमांना केराची टोपली दाखवत चौथ्यांदा ‘एमओए’चे अध्यक्षपद भुषविले आहे. हे साफ चूकीचे आहे, असे हॉकी महाराष्ट्राचे सहसचिव रणवीर सिंग यांनी सांगितले.
Comment List