अभ्यास करताना इमारतीच्या टेरेसवरून पडून गंभीर जखमी झालेल्या कनिष्का लोभी (14) या मुलीच्या उपचारासाठी मुस्लीम समाज पुढे आला आहे. मशिदीत नमाज पढल्यानंतर या मुलीच्या मदतीसाठी आवाहन करण्यात आले. त्यानंतर कनिष्काच्या उपचारासाठी दोन लाख रुपये जमा झाले आहेत. कनिष्काच्या उपचाराचा खर्च तिच्या कुटुंबाच्या आवाक्याबाहेर असल्याने दानशूर व्यक्तींनी मदत करावी, असे आवाहन करण्यात आले आहे.
कनिष्का ही नेरळच्या राजेंद्र गुरू नगर भागात राहते. अभ्यास करत असताना ती इमारतीच्या टेरेसवरून तोल जाऊन खाली पडल्याने गंभीर जखमी झाली. तिच्या डोक्याला, जबड्याला, कंबरेला आणि पायाला गंभीर दुखापत झाली असून सध्या तिच्यावर परळ येथील ग्लिनिगल रुग्णालयात उपचार सुरू आहेत. डॉक्टरांनी सुरुवातीला २५ लाख रुपयांचा खर्च सांगितला होता. मात्र आता हा खर्च ४० लाखांपर्यंत होणार सांगण्यात आल्यानंतर तिच्या कुटुंबाच्या अडचणी वाढल्या आहेत. इतका खर्च कसा कराचा या चिंतेने तिच्या कुटुंबाला ग्रासले आहे.
प्रवाशी वाहन चालवून उदरनिर्वाह
कनिष्काचे वडील प्रकाश लोभी हे नेरळ-माथेरान दरम्यान प्रवाशी वाहन चालवून घर सांभाळतात. घरात पत्नी आणि इतर लहान मुली, वडील आहेत. त्यांचे उत्पन्न अत्यंत कमी असल्याने कुटुंबाचा उदरनिर्वाह करताना त्यांना अनेक अडचणींचा सामना करावा लागत आहे.
Comment List