नगरपरिषद व नगरपंचायतींच्या निवडणुकीचे बिगूल वाजताच पालघर जिल्ह्यातील राजकीय घडामोडींना वेग आला आहे. सर्व राजकीय पक्षांच्या बैठका सुरू झाल्या असून इच्छुक उमेदवारांनीदेखील फिल्डिंग लावली आहे. पालघर जिल्ह्यात तीन नगरपरिषद व एक नगरपंचायतीची निवडणूक होत आहे. १ लाख १६ हजार ६६० मतदार ४ नगराध्यक्ष व ९४ नगरसेवक ठरवणार आहेत.
पालघर जिल्ह्यातील विकासाच्या दृष्टीने निवडणूक महत्त्वाची आहे. पालघर, डहाणू, जव्हार या नगरपरिषद तर वाडा नगरपंचायतीमध्ये निवडणूक होणार आहे. पालघर नगरपरिषदेमध्ये १५ प्रभाग असून ५६ मतदान केंद्रांतून ३० नगरसेवक द्यायचे आहेत. डहाणू नगरपरिषदेमध्ये १३ प्रभाग असून ४१ मतदान केंद्रांतून २७ नगरसेवक निवडून जाणार आहेत. जव्हार नगरपरिषदेमध्ये १० प्रभाग असून ११ मतदान केंद्रांतून २० नगरसेवक निवडले जातील. तर वाडा नगरपंचायतमध्ये १७ प्रभाग असून १७ मतदान केंद्रांतून १७ नगरसेवक निवडून द्यायचे आहेत.
पालघर नगरपरिषदेमध्ये ५५ हजार ७२७, डहाणू नगरपरिषदेत ३८ हजार ६९३, जव्हार नगरपरिषदेत ९ हजार ३४७ तर वाडा नगरपंचायतीमध्ये १२ हजार ८९३ असे जिल्ह्यात १ लाख १६ हजार ६६० मतदार आपला मतदानाचा हक्क बजावतील. ४ नोव्हेंबरला आचारसंहिता लागू करण्यात आल्याने निवडणूक स्वच्छ व पारदर्शक भयमुक्त वातावरणात व्हाव्यात यासाठी सर्वांनी सहकार्य करण्याचे आवाहन जिल्हाधिकारी डॉ. इंदू राणी जाखड यांनी केले आहे.
भरारी पथके, तक्रार निवारण कक्ष
पालघर नगरपरिषदेमध्ये ३०, डहाणूत २७, जव्हारमध्ये २० तर वाडा नगरपंचायतीमध्ये १७ सदस्य संख्या आहे. जिल्ह्यातील नगरपरिषद व नगरपंचायतीच्या निवडणुका पारदर्शकपणे पार पडाव्यात यासाठी यंत्रणा तयारी करीत असून भरारी पथके नेमली आहेत. काही मतदान केंद्रांवर वेब कास्टिंग तसेच सीसीटीव्हीद्वारे वॉच ठेवण्यात येणार आहे. तसेच नागरिकांसाठी तक्रार निवारण कक्षदेखील तयार केले असल्याची माहिती अधिकाऱ्यांनी दिली.
About The Author
Comment List