पार्किंगच्या क्षुल्लक वादात ठाण्यातील वागळे इस्टेट येथील साठे नगर येथे दिवसाढवळ्या नंग्या तलवारी नाचवत मिंध्यांच्या पंटरने दहशत माजवल्याचा धक्कादायक प्रकार समोर आला आहे. या घटनेचा व्हिडीओ सोशल मीडियात व्हायरल झाल्यानंतर खळबळ उडाली आहे. याप्रकरणी पोलिसांनी दोन हल्लेखोरांना अटक केली आहे. आकाश भालेराव (30) आणि सूरज हजारे (30) अशी अटकेत असलेल्यांची नावे आहेत. राजकीय आशीर्वादामुळे ही गुंडगिरी वाढल्याचा आरोप होत असून शहरातील कायदा सुव्यवस्थेचा पुरता विचका उडाला आहे. उपमुख्यमंत्री एकनाथ शिंदे यांच्या मतदारसंघातच गुंडांचा नंगा नाच सुरू असल्याने पोलिसांच्या कार्यपद्धतीवर संशय व्यक्त केला जात आहे.
गेल्या 3 वर्षांत ठाण्यात गुंडाराज वाढले आहे. मिंध्यांचा राजकीय आशीर्वाद पाठीशी असल्याने कोपरी, पाचपाखाडी परिसरात दिवसाढवळ्या हल्ले, विनयभंग, गुंडगिरी, गोळीबार आणि हाणामाऱ्यासारख्या घटना वाढल्या आहेत. वागळे इस्टेट येथे जखमी अजय देवरस आणि सचिन तासतोडे हे राहतात. अजय याचा वागळे इस्टेट येथील नेहरुनगर परिसरात वाहन धुलाईचा व्यवसाय आहे. मंगळवारी तो सचिन यांच्यासोबत वाहन धुलाई केंद्रात बसला होता. त्यावेळी सचिन याला आकाशने मोबाईलद्वारे संपर्क साधून त्यांच्या एका ओळखीच्या व्यक्तीचे साठेनगर भागात उभे असलेले वाहन बाजूला काढण्यास सांगितले. परंतु सचिन त्याठिकाणी गेला नाही.
पोलिसांसमोरच सांगितले मी शिंदे गटाचा पदाधिकारी
सायंकाळी 5.30 वाजताच्या सुमारास आकाश आणि सूरज यांनी सचिनसोबत वाद घालण्यास सुरुवात केली. इतकेच नाही तर दोघांनी नंग्या तलवारी नाचवत दोघांवर हल्ला केला. वागळे पोलिसांनी आकाश आणि सूरज या दोघांना अटक केली आहे. विशेष म्हणजे भर पोलीस ठाण्यात आकाश भालेराव याने आपण शिंदे गटाचे पदाधिकारी असल्याचे सांगतले.
Comment List