आम्ही युद्धाच्या पक्षात नाही! NSA अजित डोवाल यांनी चीनच्या वांग यी यांना स्पष्ट शब्दात सांगितलं

राष्ट्रीय सुरक्षा सल्लागार अजित डोवाल यांनी चीनचे परराष्ट्र मंत्री वांग यी यांच्याशी फोनवरून संवाद साधला की ‘हिंदुस्थान युद्धाच्या पक्षात नाही आणि तसे करणे कुणाच्याही हिताचे नाही’.

संभाषणानंतर प्रसिद्ध झालेल्या निवेदनात म्हटले आहे की ‘सीपीसी केंद्रीय समितीच्या राजकीय ब्युरोचे सदस्य आणि केंद्रीय परराष्ट्र व्यवहार आयोगाच्या कार्यालयाचे संचालक वांग यी यांनी हिंदुस्थानचे राष्ट्रीय सुरक्षा सल्लागार अजित डोवाल यांच्याशी फोनवरून संवाद साधला.’

एनएसए डोवाल यांनी वांग यी यांच्याशी संवाद साधताना सांगितले की पहलगाम दहशतवादी हल्ल्यात हिंदुस्थानचे मोठे नुकसान झाले आहे आणि हिंदुस्थानने दहशतवादविरोधी कारवाई करण्याची आवश्यकता आहे.

त्यांनी यावर भर दिला की हिंदुस्थान युद्धाच्या पक्षात नाही आणि ते कुणाच्याही हिताचे नाही. ‘हिंदुस्थान आणि पाकिस्तान दोघेही युद्धबंदी राखण्यासाठी वचनबद्ध आहेत आणि प्रादेशिक शांतता आणि स्थिरता लवकरात लवकर पुनर्संचयित होण्याची आशा करतात’, असे निवेदनात म्हटले आहे.

चीनच्या वतीने चीनच्या परराष्ट्रमंत्र्यांनी पहलगाम दहशतवादी हल्ल्याचा निषेध केला आणि सर्व प्रकारच्या दहशतवादाचा विरोध केला.

‘सध्याच्या गुंतागुंतीच्या आणि अस्थिर आंतरराष्ट्रीय परिस्थिती पाहता, आशियातील शांतता आणि स्थिरता परिश्रमाने मिळवता येते आणि ती जपली पाहिजे, असे त्यांनी नमूद केले. हिंदुस्थान आणि पाकिस्तान हे शेजारी देश आहेत ज्यांना दुसरीकडे जाता येत नाही आणि दोघेही चीनचे शेजारी आहेत. हिंदुस्थान युद्धाच्या पक्षात नाही,  या डोवाल यांच्या विधानाचे चीन कौतुक करतो आणि दोन्ही बाजू शांत राहतील आणि संयम बाळगतील, संवाद आणि सल्लामसलतीद्वारे मतभेद सोडवतील आणि आणखी वाद टाळतील अशी प्रामाणिक आशा करतो’, असे निवेदनात म्हटले आहे.

वांग यी यांनी हिंदुस्थान आणि पाकिस्तानला वाटाघाटीद्वारे व्यापक आणि कायमस्वरूपी युद्धबंदी साध्य करण्यासाठी चीनचा पाठिंबा व्यक्त केला.