पश्चिम बंगालमधील नादिया जिल्ह्यात एका बूथ लेव्हल ऑफिसरने (BLO) कामाच्या अतिताणामुळे जीवन संपवले आहे. मृत महिला BLO कृष्णनगरच्या शास्तीतला भागातील रहिवासी आहे. त्या छपरा पोलीस ठाणे परिसरातील बंगालझी परिसरातील बूथ क्रमांक २०२ वर बीएलओ म्हणून तैनात होत्या. पश्चिम बंगालमधील नादिया जिल्ह्यातील बीएलओ रिंकू तरफदार यांनी कथित प्रशासकीय दबावामुळे आत्महत्या केल्याचे उघड झाले आहे. रिंकू यांनी सुसाईड नोटमध्ये लिहिले आहे की, मी आता हा ताण सहन करू शकत नाही. त्या BLO चा कठीण, किचकट आणि ऑनलाइन कामाचा ताण सहन करू शकत नव्हत्या, असे त्यांच्या कुटुंबियांनी सांगितले.
कुटुंबियांच्या म्हणण्यानुसार, रिंकू तरफदार यांनी आत्महत्या करण्यापूर्वी एक सुसाईड नोट लिहिली आहे. त्यात त्यांनी त्यांच्या मृत्यूसाठी निवडणूक आयोग आणि प्रशासकीय दबावाला जबाबदार धरले आहे. कुटुंबियांचा दावा आहे की, व्यवसायाने पॅरा-शिक्षक असूनही, त्यांना कोणत्याही सवलती नाकारण्यात आल्या आणि BLO च्या कामाचा मोठा भार तिच्यावर होता. त्यांनी त्यांचे ९० टक्के काम पूर्ण करूनही ऑनलाइन कामाचाही त्यांच्यावर दबाव होता. तो दबाव आणि ताण असह्य झाल्यामुळे त्यांनी आत्महत्या केल्याचे कुटुंबियांनी सांगितले.
सुसाइड नोटमध्ये रिंकू यांनी लिहिले आहे की, मी आता हा दबाव सहन करू शकत नाही. मला अतिताणाने स्ट्रोक येण्याचा धोका आहे, असे त्यांनी म्हटले आहे. त्या रात्री ११ वाजेपर्यंत सामान्य होत्या. त्या सकाळी काम करत असतना अचानक खाली कोसळल्या आणि त्यांचा मृत्यू झाला. एका सामान्य गृहिणी आणि पॅराएज्युकेटरवर एवढी मोठी जबाबदारी टाकणे कितपत योग्य आहे? एखाद्या व्यक्तीला किती काम करावे लागते हे उच्च अधिकाऱ्यांना का समजत नाही? असे सवाल कुटुंबियांनी केले आहेत. त्यांच्या कुटुंबियांनी संपूर्ण घटनेची निष्पक्ष चौकशी करण्याची मागणी केली आहे. पोलीस या प्रकरणाची चौकशी करत आहेत.
गेल्या काही दिवसांत अनेक राज्यांमधून बीएलओंच्या मृत्यू आणि आत्महत्यांच्या घटना घडल्या आहेत. पश्चिम बंगाल व्यतिरिक्त, गुजरात, तामिळनाडू आणि केरळमध्येही बीएलओंचा मृत्यू झाला आहे. नादिया जिल्ह्यातील अलिकडच्या घटनेसह, कामाच्या ताणामुळे नऊ बीएलओंना आपले प्राण गमवावे लागले आहेत.
Comment List