राहुरीत घराच्या अंगणात खेळणाऱ्या 4 वर्षीय मुलीवर बिबट्याची झडप, उपचारांपूर्वीच मृत्यू

राहुरी तालुक्यातील वरवंडी येथे घराच्या अंगणासमोर खेळणाऱ्या वेदिका श्रीकांत ढगे या 4 वर्षीय मुलीवर गिन्नी गवतात दबा धरून बसलेल्या बिबट्याने झडप घातली. बिबट्याच्या हल्ल्यामध्ये गंभीर जखमी झालेल्या वेदिकाला तात्काळ नगर येथे उपचारांसाठी दाखल करण्यात आले. मात्र उपचारांपूर्वीच तिचा मृत्यू झाला.

मिळालेल्या माहितीनुसार, राहुल तालुक्यातील वरवंडी येथील माजी सरपंच श्रीकांत रावसाहेब ढगे यांची 4 वर्षीय मुलगी वेदिका सकाळी पावणे आठच्या सुमारास अंगणामध्ये खेळत होती. याचवेळी गिन्न गवतामध्ये दबा धरून बसलेल्या बिबट्याने तिच्यावर अचानक हल्ला केला. घरातील लोकांनी आरडाओरडा केल्याने बिबट्या पळून गेला. मात्र बिबट्याच्या हल्ल्यात वेदिका गंभीर जखमी झाली होती. तिला तात्काळ रुग्णालयात नेण्यात आले, परंतु उपचारांपूर्वीच डॉक्टरांनी तिला मृत घोषित केले.

दरम्यान, घटनेची माहिती मिळताच राहुरीचे पोलीस निरीक्षक संजय ठेंगे व त्यांचे सहकारी व वनविभागाचे वनक्षेत्रपाल युवराज पाचारणे, वनरक्षक सतीश जाधव, गाडेकर आदी कर्मचारी घटनास्थळी दाखल झाले.

राहुरी तालुक्यातील कृषिविद्यापीठ, मुळानगर, बाभुळगाव,बारागाव नांदुरसह राहता, श्रीरामपूर तालुक्यात मानवी वस्त्यांवर बिबट्यांची वर्दळ वाढली आहे. अशातच बिबट्याच्या हलल्यात मुलीचा मृत्यू झाल्याने वरवंडी परिसरात शोककळा पसरली आहे. दिवसाढवळ्या बिबट्या हल्ला करत असल्याने भागात भीतीचे वातावरण पसरले असून नरभक्षक बिबट्यास पकडण्यासाठी पिंजरा लावण्याची मागणी स्थानिकांनी केली आहे.