पिंपरी- : दापोडी परिसराचा सर्वांगीण आणि नियोजनबद्ध विकास व्हावा, नागरिकांना आवश्यक मूलभूत सुविधा उपलब्ध व्हाव्यात तसेच अनेक दिवसांपासून प्रलंबित असलेल्या विकासकामांना गती मिळावी, यासाठी राष्ट्रवादी काँग्रेस पार्टीच्या नगरसेविका स्वाती उर्फ माई काटे यांनी पुढाकार घेतला आहे. परिसरातील विविध महत्त्वाच्या विकासकामांसंदर्भात संबंधित पातळीवर सकारात्मक चर्चा करून कामांच्या पुढील नियोजनावर भर देण्यात आला.
दापोडीतील महापुरुषांच्या स्मारकांचा विकास, नवीन पाण्याची टाकी, नदीपात्राच्या संरक्षणासाठी संरक्षक भिंत, स्मशानभूमी व दफनभूमीचा विकास, हुतात्मा भगतसिंग शाळेचा विकास यांसारख्या महत्त्वाच्या कामांचा यामध्ये समावेश आहे.

नागरिकांच्या आरोग्य आणि शारीरिक तंदुरुस्तीच्या दृष्टीने दवाखाना, जिम आणि विरंगुळा केंद्र, तर सामाजिक व सांस्कृतिक उपक्रमांना हक्काचे व्यासपीठ मिळावे यासाठी सांस्कृतिक भवन आणि प्रशासकीय इमारतीच्या उभारणीबाबतही चर्चा करण्यात आली. लहान मुले, युवक आणि ज्येष्ठ नागरिकांसाठी गार्डन, स्विमिंग पूल आणि प्लेग्राउंड यांसारख्या सुविधा विकसित करण्यावरही भर देण्यात आला आहे.

पावसाळ्यात नागरिकांना होणाऱ्या त्रासावर कायमस्वरूपी उपाय करण्याच्या दृष्टीने ड्रेनेज आणि स्टॉर्म वॉटर लाईनची कामे, तसेच अंतर्गत व प्रमुख रस्त्यांच्या दर्जेदार विकासासाठी काँक्रीट रस्त्यांच्या कामांना प्राधान्य देण्याबाबत नियोजन करण्यात आले. विशेषतः गणेश नगर ते भारतरत्न डॉ. बाबासाहेब आंबेडकर स्मारक, बोपोडी पूल, एसटी रोड ते फुगेवाडी या महत्त्वाच्या मार्गावर सिमेंट काँक्रीट रस्ता विकसित करण्याबाबत सकारात्मक चर्चा झाली. हा मार्ग विकसित झाल्यास परिसरातील वाहतूक अधिक सुरळीत होण्यास मदत होणार आहे.
सिद्धार्थ नगर, प्रभाग क्रमांक ३० येथील जुने व अर्धवट अवस्थेतील शौचालय असलेली जागा मोकळी करून त्या ठिकाणी नवीन भवन उभारण्याचेही नियोजन करण्यात आले आहे. त्यामुळे या जागेचा नागरिकांच्या उपयोगासाठी अधिक चांगल्या पद्धतीने वापर होणार आहे. दरम्यान, दापोडी येथे तलाठी कार्यालयासाठी जागा उपलब्ध झाल्याबद्दल दिवंगत उपमुख्यमंत्री मा. अजितदादा पवार साहेब, महाराष्ट्र विधानसभा उपाध्यक्ष तथा पिंपरी विधानसभा आमदार मा. अण्णासाहेब बनसोडे, तसेच महापालिका आयुक्त आणि संबंधित अधिकारीवर्गाबद्दल स्वाती उर्फ माई काटे यांनी कृतज्ञता व्यक्त केली.

“दापोडीचा विकास हा केवळ काही रस्ते किंवा इमारतींपुरता मर्यादित नसून नागरिकांच्या दैनंदिन जीवनाशी निगडित प्रत्येक सुविधा सक्षम करण्याचा आमचा प्रयत्न आहे. पाणी, रस्ते, आरोग्य, शिक्षण, क्रीडा, सांस्कृतिक सुविधा आणि महापुरुषांच्या स्मारकांचा विकास या सर्व कामांचा सातत्याने पाठपुरावा करून दापोडीला अधिक सुंदर, सुरक्षित आणि सुविधासंपन्न बनविण्यासाठी आम्ही कटिबद्ध आहोत,” असे नगरसेविका स्वाती उर्फ माई काटे यांनी सांगितले.

“दापोडीचा सर्वांगीण विकास हेच आमचे ध्येय आहे. नागरिकांच्या मूलभूत गरजांपासून ते शिक्षण, आरोग्य, क्रीडा, सांस्कृतिक सुविधा, महापुरुषांच्या स्मारकांचा विकास आणि दर्जेदार रस्त्यांपर्यंत प्रत्येक कामाला गती देण्यासाठी आम्ही सातत्याने पाठपुरावा करत आहोत. केवळ आश्वासने नव्हे, तर नियोजनबद्ध विकासकामांच्या माध्यमातून दापोडीचा चेहरामोहरा बदलण्याचा आमचा संकल्प आहे. नागरिकांचा विश्वास आणि सहकार्य हीच आमच्या कामाची खरी ताकद आहे.”
— स्वाती उर्फ माई काटे
नगरसेविका, राष्ट्रवादी काँग्रेस पार्टी

पिंपरी, ५ सप्टेंबर: चिंचवड विधानसभा मतदारसंघाचे आमदार शंकर जगताप यांची जिल्हा खनिज प्रतिष्ठान (DMF), पुणेच्या नियामक परिषदेवर पदसिद्ध सदस्य म्हणून नियुक्ती करण्यात आली आहे. याबाबतचे अधिकृत पत्र जिल्हाधिकारी कार्यालयाच्या खनिकर्म शाखेने जारी केले आहे.

महाराष्ट्र शासनाच्या उद्योग, ऊर्जा, कामगार व खनिकर्म विभागाने ५ ऑगस्ट २०२६ रोजी जारी केलेल्या शासन निर्णयानुसार तसेच ११ ऑक्टोबर २०२४च्या अधिसूचनेतील तरतुदींनुसार ही नियुक्ती करण्यात आली आहे. जिल्हा खनिज प्रतिष्ठानच्या नियामक परिषदेवर खाणकामामुळे बाधित भाग आणि तेथील नागरिकांच्या विकासासाठी धोरण ठरविण्याची महत्त्वाची जबाबदारी असते. प्रतिष्ठानचा वार्षिक कृती आराखडा व अर्थसंकल्प मंजूर करणे, विकासकामांना मान्यता देणे, निधीचा योग्य आणि पारदर्शक वापर होत असल्याची खात्री करणे, कामांचा वेळोवेळी आढावा घेणे तसेच वार्षिक अहवाल आणि लेखापरीक्षित खात्यांना मंजुरी देणे, ही परिषदेची प्रमुख कामे आहेत.

जिल्हा खनिज अधिकारी तथा सदस्य सचिव आनंद पाटील यांनी जिल्हाधिकाऱ्यांच्या मान्यतेने हे नियुक्तिपत्र जारी केले आहे.

“जिल्हा खनिज प्रतिष्ठान पुणेच्या नियामक परिषदेवर पदसिद्ध सदस्य म्हणून मिळालेली जबाबदारी प्रामाणिकपणे पार पाडणार आहे. खनिजबाधित भागातील नागरिकांच्या मूलभूत सुविधा, आरोग्य, शिक्षण आणि पर्यावरण संवर्धनासाठी उपलब्ध निधीचा योग्य व पारदर्शक वापर व्हावा, यासाठी प्राधान्याने प्रयत्न करेन.”

 शंकर जगताप 
आमदार, चिंचवड विधानसभा मतदारसंघ 

चिंचवड :  शिक्षक दिनाचे औचित्य साधून चिंचवड येथील कमला एज्युकेशन सोसायटी संचलित प्रतिभा कॉलेज ऑफ कॉमर्स अँड कॉम्प्युटर स्टडीज या महाविद्यालयात ‘एक दिवस विद्यार्थ्यांचा’ हा अनोखा उपक्रम उत्साहात राबवण्यात आला. या उपक्रमांतर्गत विद्यार्थ्यांनी एक दिवसासाठी प्राचार्या, उपप्राचार्या आणि प्राध्यापकांची भूमिका पार पाडली.
डॉ. सर्वपल्ली राधाकृष्णन यांच्या जयंतीनिमित्त दरवर्षी ५ सप्टेंबर रोजी शिक्षक दिन साजरा केला जातो. याच पार्श्वभूमीवर महाविद्यालयात हा उपक्रम घेण्यात आला. सकाळी संस्थेचे सचिव डॉ. दीपक शहा यांच्या हस्ते निवड झालेल्या विद्यार्थ्यांकडे पदभार सोपवण्यात आला.
यामध्ये कु. मुस्कान शेख हिने एक दिवसाची प्राचार्या, कु. जेसिका शर्मा हिने उपप्राचार्या, तर ५० हून अधिक विद्यार्थ्यांनी विविध विभागांचे प्राध्यापक म्हणून काम पाहिले. विद्यार्थी प्राध्यापकांनी वर्गावर जाऊन तासिका घेतल्या, प्रात्यक्षिके घेतली आणि विद्यार्थ्यांच्या शंका सोडवल्या. तर विद्यार्थी प्राचार्यांनी दिवसभर महाविद्यालयाचे प्रशासन, शिस्त आणि शैक्षणिक कामकाजाचे नियोजन पाहिले.

आपल्या मनोगतात विद्यार्थी प्राचार्या मुस्कान शेख म्हणाली, “एक दिवस जरी असले तरी प्राचार्य पदाची जबाबदारी किती मोठी आहे, हे आज समजले. प्राध्यापकांना वर्ग सांभाळताना किती मेहनत घ्यावी लागते, याची जाणीव झाली.” यावेळी विद्यार्थी प्राध्यापकांनीही आपल्या भावना व्यक्त करत शिक्षकांप्रती कृतज्ञता व्यक्त केली.
या कार्यक्रमाला संस्थेचे सचिव डॉ. दीपक शहा, खजिनदार डॉ. भूपाली शहा, संचालिका डॉ. तेजल शहा यांचे मार्गदर्शन लाभले. तसेच प्राचार्या डॉ. क्षितिजा गांधी, उपप्राचार्या डॉ. जयश्री मुळे, मुख्य प्रशासकीय अधिकारी डॉ. राजेंद्र कांकरिया, स्टाफ अकॅडमीच्या समन्वयिका डॉ. जयश्री कांबळे, प्रा. स्नेहल वऱ्हाडे यांच्या हस्ते भेटवस्तू देऊन विद्यार्थी प्राध्यापकांचा खास सत्कार करण्यात आला.

याप्रसंगी प्राचार्या डॉ. क्षितिजा गांधी यांनी शिक्षकांचे महत्त्व विषद केले, तर मुख्य प्रशासकीय अधिकारी डॉ. राजेंद्र कांकरिया यांनी आपल्या कारकिर्दीतील अनुभव सांगून मार्गदर्शन करताना भविष्यात आदर्श शिक्षकी पेशा स्वीकारण्याचे आवाहन शिक्षक झालेल्या विद्यार्थ्यांना केले. तुमच्यात आत्मविश्वास , प्रामाणिकपणा , विद्यार्थ्याप्रती आदर हे गुण असतील तर ते अंगीकारून शिक्षकी पेक्षा भविष्यात स्वीकारावा . कारण शिक्षक हा एक पिढी धडवत असतो . चांगल्या शिक्षकांची आजही खूप गरज आहे असे सांगुन नुकताच आदर्श शिक्षक म्हणून गौरविण्यात आलेले महाराष्ट्रातील डॉ . कविता गित्ते , सीमा शिंदे , कुंदा बच्छाव याची सखोल माहीती उपस्थितांना दिली .

समारोप प्रसंगी राष्ट्रीय सेवा योजनेच्या विद्यार्थ्यांनी पथनाट्य व गणेश वंदना सादर केली. उपस्थित मान्यवरांचे स्वागत प्रियंका गंगावणे यांनी केले, सूत्रसंचालन विद्यार्थिनी सरस्वती जोशी हिने केले, तर आभार विद्यार्थी उपप्राचार्या जेसिका शर्मा हिने मानले. यावेळी सर्व विभागप्रमुख, शिक्षकवृंद आणि विद्यार्थी मोठ्या संख्येने उपस्थित होते.

पिंपरी | प्रतिनिधी

पिंपरी-चिंचवड महानगरपालिकेच्या मोरवाडी औद्योगिक प्रशिक्षण संस्थेतील (ITI) प्रशिक्षणार्थी असिफ अल्लाउद्दीन मुलानी याने आपल्या कौशल्याच्या जोरावर आंतरराष्ट्रीय स्तरावर उल्लेखनीय यश संपादन केले आहे. सन 2021-23 सत्रातील ड्राफ्ट्समन मेकॅनिकल ट्रेडचा प्रशिक्षणार्थी असिफ याची सौदी अरेबियातील दमाम येथे ज्युनियर डिझायनर म्हणून निवड झाली आहे.

असिफने ITIच्या प्रथम व द्वितीय अंतिम परीक्षेत प्रथम क्रमांक मिळवला होता. या गुणवत्तेच्या आधारावर त्याला इनप्रो कंपनीमध्ये शिकाऊ उमेदवारीची संधी मिळाली. त्यानंतर त्याची याच कंपनीमध्ये ट्रेनी म्हणून निवड झाली.

दरम्यान, उत्कृष्ट कामकाज, तांत्रिक कौशल्य आणि प्रामाणिकपणाच्या जोरावर असिफने कंपनीचा विश्वास संपादन केला. त्याच्या कामगिरीचे मूल्यमापन केल्यानंतर इनप्रो कंपनीने सौदी अरेबियातील आपल्या मुख्य कंपनीमध्ये असिफची ज्युनियर डिझायनर म्हणून निवड केली आहे. विशेष म्हणजे, या नियुक्तीसाठी आवश्यक असलेला सर्व खर्च कंपनीकडून करण्यात येणार आहे.

हलाखीच्या परिस्थितीतून यशाची भरारी

असिफच्या यशाला आणखी विशेष महत्त्व आहे. आई-वडिलांचे छत्र नसतानाही आणि अत्यंत हलाखीच्या परिस्थितीतून त्याने संघर्ष करत हे उत्तुंग यश संपादन केले आहे. त्याचा संघर्ष आणि यशाचा प्रवास इतर विद्यार्थ्यांसाठी प्रेरणादायी ठरत आहे.

असिफच्या यशाने प्रेरित होऊन त्याच्या बहिणीनेही मोरवाडी ITIमध्ये चालू शैक्षणिक वर्षात ड्राफ्ट्समन मेकॅनिकल ट्रेडला प्रवेश घेतला आहे. त्यामुळे एका विद्यार्थ्याच्या यशातून कुटुंबातील इतर सदस्यांनाही करिअरची नवी दिशा मिळत असल्याचे दिसून येते.

परदेशी शिक्षण व रोजगाराचा उपक्रम

मोरवाडी ITIकडून अशा विद्यार्थ्यांना सातत्याने प्रोत्साहन देण्यात येते. जास्तीत जास्त विद्यार्थ्यांचे उज्ज्वल करिअर घडविण्याच्या दृष्टीने संस्थेकडून विविध प्रयत्न केले जात आहेत.

अतिरिक्त आयुक्त कुलदीप जंगम यांच्या सूचनेनुसार व मार्गदर्शनाखाली विभागांतर्गत ‘परदेशी शिक्षण व रोजगार’ हा नाविन्यपूर्ण उपक्रम लवकरच सुरू करण्यात येणार आहे. या माध्यमातून विद्यार्थ्यांना परदेशातील शिक्षण आणि रोजगाराच्या संधी उपलब्ध करून देण्यावर भर दिला जाणार आहे.

असिफने मिळवलेल्या यशाबद्दल तसेच त्याच्या पुढील वाटचालीसाठी प्राचार्य शशिकांत पाटील, गटनिदेशक ओव्हाळ आर. एस., निदेशक काळोखे व्ही. व्ही. तसेच सर्व गटनिदेशक व निदेशकांनी हार्दिक अभिनंदन करून पुढील वाटचालीसाठी शुभेच्छा दिल्या.

मोशी : कृष्णानगर येथील स्पाईन रस्तालगत असलेल्या सेवा रस्त्यावर दिवसेंदिवस अनधिकृतपणे उभ्या राहणाऱ्या अवजड वाहनांमुळे स्थानिक रहिवासी आणि वाहनचालक  त्रस्त झाले आहेत. मुख्य रस्त्याला जोडणाऱ्या या सर्विस रस्त्यावर ट्रक, कंटेनर, ट्रॅव्हल्स यांसारखी अवजड वाहने दोन्ही बाजूंना तासनतास नव्हे तर कित्येक दिवस बेकायदेशीरपणे उभी करून ठेवली जातात. त्यामुळे या रस्त्यावरून चालणे आणि वाहने चालवणे अत्यंत कठीण झाले असून परिसरात अपघातांची शक्यता मोठ्या प्रमाणावर वाढली आहे.

​या रस्त्यावर सतत उभ्या असणाऱ्या अवजड वाहनांमुळे संपूर्ण रस्ता अडवला जातो, ज्यामुळे स्थानिक नागरिकांना नाहक त्रासाला सामोरे जावे लागत आहे. विशेषतः रात्रीच्या वेळी कामानिमित्त बाहेरून घरी परतणाऱ्या महिला, तरुणी आणि ज्येष्ठ नागरिकांच्या सुरक्षेचा गंभीर प्रश्न निर्माण झाला आहे. अवजड वाहनांच्या आडोशाने रात्रीच्या अंधारात मद्यपी व समाजकंटकांचा वावर वाढण्याची भीती व्यक्त होत असून महिलांना सुरक्षितपणे ये-जा करणे जिकिरीचे झाले आहे. या समस्येमुळे त्रस्त झालेल्या नागरिकांनी वारंवार तक्रारी करूनही समस्येवर कायमस्वरूपी तोडगा न निघाल्याने संताप व्यक्त केला जात आहे.

​"कृष्णा नगर स्पाईन रोड सर्विस रस्त्यावरील अवजड वाहनांची बेकायदेशीर पार्किंग ही गंभीर समस्या बनली आहे. स्थानिक रहिवाशांना आणि विशेषतः महिलांना रात्रीच्या वेळी या मार्गावरून जाणे असुरक्षित झाले आहे. या मार्गावरील सर्व बेकायदा वाहनांवर तात्काळ दंडात्मक कारवाई करून रस्ता पूर्णपणे मोकळा करण्यासाठी आम्ही वाहतूक पोलिसांकडे पाठपुरावा करत आहोत."

नगरसेवक निलेशदादा नेवाळे  

​"नागरिकांची सुरक्षितता आणि सुविधा ही आमची प्राथमिकता आहे. सर्विस रस्त्यावर उभ्या राहणाऱ्या वाहनांमुळे परिसरातील महिलांना प्रचंड मनस्ताप सहन करावा लागत आहे. ही समस्या कायमस्वरूपी सोडवण्यासाठी प्रशासनाशी चर्चा करून योग्य त्या उपाययोजना राबवल्या जातील आणि नागरिकांना सुरक्षित वातावरण मिळवून दिले जाईल."
— नगरसेविका रिटा सानप 

​"संबंधित सेवा रस्त्यावरील अनधिकृत अवजड वाहनांवर आमची कारवाई सुरू आहे. या भागात लवकरच अधिकृतपणे 'नो पार्किंग'चे फलक लावण्यात येणार आहेत. यानंतरही जर नियमांचे उल्लंघन करून कोणी वाहने पार्क केली, तर त्यांच्यावर आणखी कठोर दंडात्मक व कायदेशीर कारवाई करण्यात येईल."

— रामचंद्र घाडगे
 (वाहतूक पोलीस विभाग, तळवडे)

चिंचवड: रक्ताच्या नात्यांपलीकडे जाऊन समाजातील उपेक्षित घटकाला प्रेमाची आणि आपुलकीची ऊब देणे हीच खरी सणांची सार्थकता असते, याचा प्रत्यय चिंचवड येथील पुनरुत्थान समरसता गुरुकुलममध्ये आला. वंचित, भटके आणि विमुक्त समाजातील मुलांच्या चेहऱ्यावर उत्सवाचा खरा आनंद फुलवण्याच्या उदात्त भावनेतून 'तत्वम सोशल फाउंडेशन'च्या वतीने गुरुकुलममधील तब्बल 350 मुला-मुलींसोबत अनोखा रक्षाबंधन सोहळा आणि स्नेहभोजनाचा संवेदनशील उपक्रम मोठ्या उत्साहात पार पडला. 

उपक्रमादरम्यान फाउंडेशनने नेलेल्या  राख्यांनी वातावरण भावूक झाले होते. गुरुकुलममधील मुलींनी तेथील मुलांना मायेची राखी बांधली, तसेच उपस्थित फाउंडेशनच्या पदाधिकाऱ्यांनाही राखी बांधत अनोखा जिव्हाळा जपला. रक्षाबंधन हा केवळ रूढी परंपरेतील सण नसून समाजातील दुर्लक्षित घटकांप्रती वाटणारी माणुसकी, आदर आणि सामाजिक बांधिलकीची ती एक प्रतिज्ञा आहे, ही भावना यावेळी अधोरेखित झाली. 

याप्रसंगी ज्येष्ठ विचारवंत व समाजसेवक पद्मश्री गिरीशकाका प्रभुणे यांनी उपस्थितांना मार्गदर्शन करताना सांगितले की, वंचित आणि उपेक्षित समाजाच्या मुख्य प्रवाहात येण्यासाठी अशा आत्मीय उपक्रमांची नितांत गरज आहे. विशेषतः तत्वम फाउंडेशनच्या माध्यमातून सुशिक्षित तरुण वर्ग एकत्र येऊन सामाजिक जबाबदारीचे भान जपत असल्याबद्दल त्यांनी विशेष समाधान व्यक्त केले, तसेच हे सेवाकार्य अविरत सुरू ठेवण्याचे आवाहन केले. 

तत्वम सोशल फाउंडेशनचे अध्यक्ष रवींद्र ठिकेकर म्हणाले की, सणांचा खरा आनंद हा समाजातील दुर्लक्षित व वंचित घटकांसोबत वाटून घेण्यातच असतो. या चिमुकल्यांच्या चेहऱ्यावरील हास्य हीच आमच्या सामाजिक कार्याची खरी ताकद असून, त्यांच्याशी जोडलेली ही नात्यांची आणि विश्वासाची वीण अधिक घट्ट करण्याचा आमचा निरंतर प्रयत्न राहील. 

या भावूक सोहळ्यानंतर सर्व 350 मुलांसाठी अत्यंत प्रेमाने आणि तृप्तीने भरवलेल्या स्नेहभोजनाने (अन्नदान) मुलांच्या चेहऱ्यावर समाधानाचे हसू फुलवले. या हृदयस्पर्शी उपक्रमासाठी तत्वम सोशल फाउंडेशनचे अध्यक्ष रवींद्र ठिकेकर, यांच्यासह सचिव वंदना चौहान, खजिनदार मनीषा पिसाळ यांच्यासह सदस्य आयुष चौहान, संदीप पिसाळ, श्रीराम घाटूळ आणि रजनी मांडले आदींनी विशेष परिश्रम घेतले.

मोशी: आयुष्याच्या वाटेवर संकटांनी घेरलेली, नैराश्य आणि प्रचंड मानसिक तणावाखाली वावरणारी अनेक माणसं आधाराच्या शोधात असतात. अशा हताश मनांना योग्य दिशा दाखवून टोकाचे पाऊल उचलण्यापासून रोखण्याचे अनोखे कार्य मूळचे कर्नाटक येथील ज्योतिष अभ्यासक नटराज आमले मागील बारा वर्षांपासून सातत्याने करत आहेत. सध्या पूर्णानगर परिसरातील पदपथावर बसून लोकांचे समुपदेशन करणाऱ्या आमले यांचे कुठेही कायमस्वरूपी वास्तव्य नसते; मात्र जिथे जातील तिथे तणावग्रस्त आणि गोरगरीब लोकांच्या पाठीशी ते खंबीरपणे उभे राहतात.

ज्योतिषशास्त्राचा आधार घेऊन आमले केवळ भविष्य वर्तवत नाहीत, तर खचलेल्या मनांना उभारी देण्याचे महत्त्वाचे काम करतात. केवळ शास्त्र पाहिल्याने कोणाचेही नशीब किंवा भाग्य एका रात्रीत बदलत नाही; परंतु योग्य मार्गदर्शन आणि सकारात्मक विचारांमुळे व्यक्तीला मानसिक समाधान मिळते आणि कठीण काळात स्वतःला सावरण्याची ताकद मिळते, असा त्यांचा ठाम विश्वास आहे. आयुष्यात आलेल्या अपयशाने खचून जाऊन कोणीही चुकीचा निर्णय किंवा टोकाचे पाऊल उचलू नये, यासाठी ते लोकांना विश्वासात घेऊन धीर देतात.

बदलत्या तंत्रज्ञानाच्या युगावर भाष्य करताना त्यांनी सांगितले की, पूर्वी लग्नकार्य, वास्तूपूजा अथवा कोणताही शुभ विधी करताना पंचांग आणि अचूक मुहूर्ताचा सखोल अभ्यास केला जात असे. आजच्या मोबाईलच्या जमान्यात राहू काळ किंवा इतर गोष्टी केवळ स्क्रीनवर पाहून लोक निर्णय घेतात. मात्र, शास्त्र आणि कुंडलीचे विश्लेषण हे अत्यंत सूक्ष्म अभ्यासाचा विषय असून ते संबंधित क्षेत्रातील तज्ज्ञांकडूनच समजून घेणे गरजेचे आहे. भौतिक सुखाच्या मागे धावताना निर्माण होणाऱ्या मानसिक कोंडीवर मात करण्यासाठी नटराज आमले पदपथावर राहूनही अनेकांच्या आयुष्याला आशेचा किरण दाखवत आहेत.

पिंपरी, पुणे (दि.३० ऑगस्ट २०२६) | संघर्ष, साधना म्हणजे आशाताई भोसले, अशा महान व्यक्तींच्या नावाचा पुरस्कार मिळणे हा माझ्यासाठी अत्यंत मोठा सन्मान आहे.  लतादीदी, आशाताई, हृदयनाथजी आणि उषाताई यांची गाणी ऐकून मी मोठी झाले. संगीतातील "सा" देखील यांच्यामुळेच शिकले. मी स्वतःमध्ये आशाताई आणण्याचा प्रयत्न करते. माझे पहिले मराठी भाषेतील गाणे ‘गणराज रंगी नाचतो’ हे रेकॉर्ड झाले तेंव्हा मी १३ वर्षाची होते. आशाताईंची गाणी ऐकून मला प्रेरणा मिळते. भाऊसाहेब भोईर यांच्या निमंत्रणाचा मी स्वीकार करते आणि लवकरच पिंपरी चिंचवड शहरासाठी एक सांगीतिक कार्यक्रम करेल असे आश्वासन आंतरराष्ट्रीय ख्यातीची गायिका श्रेया घोषाल यांनी "२१ वा आशा भोसले पुरस्कार" स्वीकारल्यानंतर मनोगत व्यक्त करताना दिले.

अखिल भारतीय मराठी नाट्य परिषद पिंपरी चिंचवड शाखा, पिंपरी चिंचवड कलारंग प्रतिष्ठान आणि सिद्धिविनायक ग्रुप यांच्या संयुक्त विद्यमाने राष्ट्रीय स्तरावर संगीत क्षेत्रात उल्लेखनीय योगदानाबद्दल यावर्षीचा हा २१ वा प्रतिष्ठित ‘आशा भोसले पुरस्कार २०२६’ सुप्रसिद्ध पार्श्वगायिका श्रेया घोषाल यांना ज्येष्ठ संगीतकार पं. हृदयनाथ मंगेशकर यांच्या हस्ते शनिवारी, (दि. २९) प्रा. रामकृष्ण मोरे प्रेक्षागृह, चिंचवड येथे आयोजित करण्यात आलेल्या भव्य सोहळ्यात प्रदान करण्यात आला.

यावेळी अखिल भारतीय मराठी नाट्य परिषद पिंपरी चिंचवड शाखा अध्यक्ष भाऊसाहेब भोईर, आमदार अमित गोरखे, माजी महापौर व ज्येष्ठ नगरसेवक योगेश बहल, पिंपरी चिंचवड मनपा आयुक्त डॉ. विजय सूर्यवंशी, उद्योजक कृष्ण कुमार गोयल, नगरसेवक गौरव घुले तसेच मानसी भोईर- घुले, वंदना घांगूर्डे, रुणाल सांकला, दिलीप काटकर, हर्षवर्धन भोईर, किरण येवलेकर, राजू बंग, गौरी लोंढे आदी उपस्थित होते.  हा पुरस्कार रु. १,११,०००/- रोख, शाल, श्रीफळ, सन्मानचिन्ह पं. हृदयनाथ मंगेशकर यांच्या हस्ते आणि पैठणी मानसी भोईर-घुले यांच्या हस्ते श्रेया घोषाल यांना प्रदान करण्यात आली.

पंडित हृदयनाथ मंगेशकर यांनी श्रेया घोषाल यांना आशीर्वाद देताना सांगितले की, श्रेयाला मी लहानपणापासून बघतो आहे सर्वप्रथम षण्मुखानंद हॉलमध्ये माझेच गाणे गाताना मी तिला पाहिले. तेव्हाच तिला तू खूप छान गाते, असा आशीर्वाद दिला आहे. आता भाऊसाहेब भोईर आमदार व्हावेत अशी इच्छा आहे. आ. अमित गोरखे यांनी सांगितले की, भाऊसाहेब भोईर हे या शहराचे सांस्कृतिक मंत्री आहेत. भोईर जर यापूर्वी भाजपमध्ये आले असते तर, आज ते राज्याचे सांस्कृतिक मंत्री झाले असते. अजूनही वेळ गेली नाही, असे म्हणतात प्रेक्षकांनी उत्स्फूर्तपणे टाळ्यांचा कडकडाट करून आ. गोरखे यांना प्रतिसाद दिला.

स्वागत, प्रास्ताविक करताना भाऊसाहेब भोईर यांनी सांगितले की,   या सांगीतिक प्रवासाचा श्वास लतादीदी आहेत, तर उच्छवास आशादीदी आणि याचे हृदय म्हणजे पंडित हृदयनाथ मंगेशकर आहेत. लता मंगेशकर यांना देश सन्मानाने दीदी म्हणतो तसेच आता श्रेया घोषाल या आमच्या "छोटी दीदी" आहेत. त्यांनी पिंपरी चिंचवड शहरात कार्यक्रम करण्यासाठी वेळ द्यावा असा आग्रह केला. याला श्रेया घोषाल यांनी देखील हात उंचावून होकार दर्शविला. आयुक्त डॉ. सूर्यवंशी यांनी सांगितले की, आशा भोसले यांच्या नावाने दिला जाणारा हा पुरस्कार म्हणजे पिंपरी चिंचवड शहराचा सन्मान आहे. पुरस्कार वितरण सोहळ्यात मोरया थिएटर निर्मित ‘आशा से श्रेया तक’ हा विशेष सांगीतिक कार्यक्रम झाला. यावेळी श्रेया घोषाल यांच्या हस्ते मानसी भोईर-घुले यांच्या "मानसी रेस्कोर" या बँडचे अनावरण करण्यात आले. आशा भोसले आणि श्रेया घोषाल यांच्या गाजलेल्या सदाबहार गीतांची मैफलीचा रसिकांनी आनंद लुटला. यावेळी मानसी भोईर-घुले यांनी देखील गाणी गायली.

तसेच या पुरस्काराच्या गौरवशाली परंपरेची माहिती देणारी चित्रफीत सादर करण्यात आली. यामध्ये सन २००२ पासून अखिल भारतीय मराठी नाट्य परिषद, पिंपरी चिंचवड शाखेतर्फे हा राष्ट्रीय स्तरावरील पुरस्कार दिला जातो. यापूर्वी हा सन्मान गानकोकिळा स्व. लता मंगेशकर, संगीतकार खय्याम, रवींद्र जैन, बप्पी लहरी, प्यारेलालजी, आनंदजी, पं. हृदयनाथ मंगेशकर, उषा मंगेशकर, अनु मलिक, शंकर महादेवन, पं. शिवकुमार शर्मा, सुरेश वाडकर, हरीहरन, सोनू निगम, सुनिधी चौहान, पद्मभूषण उदित नारायण, रूपकुमार राठोड, अवधूत गुप्ते, डॉ. सलील कुलकर्णी आणि शान (शांतनू मुखर्जी) यांसारख्या संगीतातील दिग्गजांना प्रदान करण्यात आला असल्याची माहिती देण्यात आली.

पिंपरी : खासगी वाहनांवर परवानगीशिवाय ‘पोलिस’ असा मजकूर, पोलिसांचे बोधचिन्ह किंवा लोगो वापरणाऱ्या वाहनचालकांवर पिंपरी-चिंचवड वाहतूक पोलिसांनी कारवाईचा बडगा उगारला आहे. ऑगस्ट महिन्यात आतापर्यंत अशा २३ वाहनचालकांवर कारवाई करून ११ हजार ५०० रुपयांचा दंड वसूल करण्यात आला आहे.

शहरातील अनेक खासगी दुचाकी आणि चारचाकी वाहनांवर ‘पोलिस’ असा मजकूर, पोलिस विभागाशी संबंधित लोगो किंवा विविध चिन्हे लावल्याचे निदर्शनास येत आहे. अधिकृत परवानगीशिवाय अशा प्रकारे पोलिसांची ओळख दर्शविणे नियमबाह्य आहे. त्यामुळे वाहतूक पोलिसांकडून अशा वाहनांवर कारवाई केली जात आहे.

खासगी वाहनांवर पोलिसांचा लोगो का?

नियमांनुसार पोलिस विभागाचे अधिकृत बोधचिन्ह, चिन्हे किंवा ‘पोलिस’ असा मजकूर केवळ अधिकृत पोलिस वाहने किंवा सक्षम प्राधिकरणाची परवानगी असलेल्या वाहनांवरच वापरता येतो. मात्र, काही खासगी वाहनचालकांकडून सर्रासपणे अशा चिन्हांचा वापर केला जात असल्याचे आढळून येत आहे.

अशा वाहनांमुळे सर्वसामान्य नागरिकांमध्ये संभ्रम निर्माण होण्याबरोबरच या वाहनांचा गैरप्रकार किंवा गुन्हेगारी कृत्यांसाठी गैरवापर होण्याची शक्यताही नाकारता येत नाही.

काय सांगतो कायदा?

कायदा १९५० नुसार पोलिस बोधचिन्हाचा वापर कोणत्याही व्यापारी, व्यावसायिक किंवा जाहिरातीच्या उद्देशाने करता येत नाही. तसेच खासगी वाहनांवर अनधिकृत नामफलक, स्टीकर किंवा चिन्हे लावल्यास मोटार वाहन अधिनियम, १९८८ अंतर्गत कारवाई करण्याचे अधिकार वाहतूक पोलिसांना आहेत.

पोलिस असल्याचा धाक दाखवण्याचा प्रकार

काही प्रकरणांमध्ये अशा वाहनांचा अवैध कामांसाठी किंवा नागरिकांमध्ये दहशत निर्माण करण्यासाठी वापर होण्याची शक्यता आहे. पोलिस अधिकारी किंवा कर्मचाऱ्यांच्या मुलांच्या अथवा नातेवाइकांच्या वाहनांवरही पोलिसांचे नाव किंवा लोगो लावल्याचे प्रकार आढळतात.

पोलिस असल्याचा धाक दाखवून प्रवासी वाहनांचा वापर होत असल्याच्या तक्रारीही समोर आल्या आहेत. नाकाबंदी, पेट्रोलिंग आणि वाहन तपासणीदरम्यान अशा वाहनांकडे दुर्लक्ष होत असल्याने काही ठिकाणी हा प्रकार वाढत असल्याचे दिसून येते.

विक्रांत देशमुख, पोलिस उपायुक्त, गुन्हे शाखा, पिंपरी-चिंचवड यांनी सांगितले,
“पोलिसांचे बोधचिन्ह खासगी वाहनावर लावण्याची परवानगी नाही. नियमांचे उल्लंघन करणाऱ्या वाहनचालकांवर वाहतूक पोलिसांकडून योग्य ती कारवाई केली जात आहे. ऑगस्ट महिन्यात २३ वाहनचालकांवर कारवाई करत ११ हजार ५०० रुपये इतका दंड वसूल करण्यात आला आहे.”

पुणे : चाकण-तळेगाव औद्योगिक क्षेत्रातील उद्योगांचे स्थलांतर रोखण्यासाठी शासनाने पायाभूत सुविधांच्या विकासासह वाहतूक कोंडीचा प्रश्न कायमस्वरूपी सोडवण्यावर भर दिला आहे. उद्योजकांच्या अडचणी दूर करून उद्योगांना आवश्यक सुविधा उपलब्ध करून देण्यासाठी तातडीच्या आणि दीर्घकालीन उपाययोजना करण्यात येत असल्याची माहिती उपमुख्यमंत्री तथा नगरविकास मंत्री एकनाथ शिंदे यांनी दिली.

उपमुख्यमंत्री शिंदे यांनी तळेगाव आणि चाकण येथे भेट देत रस्ते दुरुस्तीच्या कामांची पाहणी केली. तसेच चाकण-तळेगाव औद्योगिक क्षेत्रातील उद्योजकांच्या प्रतिनिधींसोबत बैठक घेऊन त्यांच्या विविध समस्या जाणून घेतल्या.

वाहतूक कोंडीवर तातडीने काम

चाकण औद्योगिक क्षेत्रातील वाहतूक कोंडीच्या विविध ठिकाणांची पाहणी करून शिंदे यांनी सद्यस्थितीचा आढावा घेतला. पावसामुळे खराब झालेल्या रस्त्यांवरील खड्डे बुजवण्यासाठी एम-६० हार्डनरचा वापर केला जात आहे. तसेच रस्त्यांवर थेट कास्टिंग केलेले पॅचेस बसवण्याचे काम सुरू आहे.

जिओ पॉलिमर टेक्नो पॅच आणि एम-६ आरएमसी विथ हार्डनरच्या माध्यमातून खड्डे कमी वेळेत दुरुस्त करून अवजड वाहतूक तातडीने सुरू करण्याचा प्रयत्न केला जात आहे. सर्वाधिक खराब झालेल्या ठिकाणी प्री-कास्ट पॅनेल बसवण्याचे कामही हाती घेण्यात आले आहे.

दर शुक्रवारी विशेष नोडल समितीची बैठक

औद्योगिक क्षेत्रातील समस्या कायमस्वरूपी सोडवण्यासाठी जिल्हाधिकाऱ्यांच्या अध्यक्षतेखाली विशेष नोडल समिती स्थापन करण्यात आली आहे. या समितीची बैठक आता दर शुक्रवारी होणार आहे.

रस्ते, ड्रेनेज, फुटपाथ आणि स्ट्रीट लाईट्ससह औद्योगिक क्षेत्रातील पायाभूत सुविधांच्या विकासावर या समितीमार्फत विशेष लक्ष दिले जाणार आहे.

५४ किमी मार्गाच्या दुरुस्तीला गती

तळेगाव ते शिक्रापूर या ५४ किलोमीटर मार्गाच्या दुरुस्तीला गती देण्यात येणार आहे. यासोबतच नाशिक फाटा-राजगुरुनगर रस्ता आणि औद्योगिक क्षेत्रातील अंतर्गत रस्त्यांची कामेही वेगाने पूर्ण करण्याचे नियोजन आहे.

रस्ते विकास करताना फुटपाथ, युटिलिटी आणि सायकल ट्रॅकचा समावेश करण्याचे निर्देशही देण्यात आले आहेत.

कामगारांसाठी वसाहती आणि मेट्रोचा विस्तार

औद्योगिक क्षेत्रात कामगारांचा प्रवासाचा वेळ कमी करण्यासाठी क्लस्टरच्या माध्यमातून कामगार वसाहती उभारण्याबाबत सकारात्मक निर्णय घेतला जाणार आहे.

दरम्यान, निगडी-चाकण, चाकण-राजगुरुनगर आणि तळेगाव-शिक्रापूर या मेट्रो मार्गांचा विकास आराखडा तयार करण्याचे निर्देश महामेट्रोला देण्यात आले आहेत.

उद्योजकांच्या समस्या सोडवण्यासाठी अधिकारी उपलब्ध

उद्योजकांच्या समस्या तातडीने सोडवण्यासाठी एमआयडीसीचे कार्यकारी अभियंते आणि अन्य अधिकारी आठवड्यातून एक दिवस प्रत्यक्ष उपलब्ध राहणार आहेत. उद्योजकांनी आपल्या समस्या मांडण्यासाठी ‘मैत्री’ ॲपचा अधिकाधिक वापर करावा, असे आवाहन करण्यात आले आहे.

याशिवाय वीज ट्रान्सफॉर्मरची क्षमता वाढवणे, लोडशेडिंगचे नियोजन, स्वतंत्र एजन्सीमार्फत कचऱ्याची विल्हेवाट, तसेच पाणीपुरवठा आणि पोलीस प्रशासनाशी संबंधित प्रश्न तातडीने सोडवण्याचे निर्णय बैठकीत घेण्यात आले.

उद्योग स्थलांतराचा निर्णय बदलण्याची चिन्हे

शासनाच्या उपाययोजनांमुळे चाकण-तळेगाव औद्योगिक क्षेत्रातील उद्योजकांच्या समस्यांवर तोडगा निघण्यास सुरुवात झाली आहे. त्यामुळे उद्योग बाहेर स्थलांतरित करण्याबाबत उद्योजकांच्या भूमिकेतही सकारात्मक बदल झाल्याचे बैठकीत स्पष्ट झाले.

भोसरी: पिंपरी-चिंचवड महानगरपालिकेच्या  विजयदुर्ग 'क' क्षेत्रीय कार्यालय, भोसरी येथे देशाचा ८० वा स्वातंत्र्यदिन अत्यंत उत्साहात आणि सन्मानपूर्वक वातावरणात साजरा करण्यात आला. यावेळी आयोजित ध्वजारोहण समारंभास उपस्थित राहून राष्ट्रध्वजाला मानवंदना देण्यात आली. राष्ट्रगीत आणि राज्यगीताच्या जयघोषात ध्वजारोहण संपन्न झाल्यानंतर एमएसएफ (MSF) जवानांनी सादर केलेले शिस्तबद्ध संचलन उपस्थितांचे लक्ष वेधून घेणारे ठरले.

याप्रसंगी क क्षेत्रीय अध्यक्ष निखिल बोऱ्हाडे यांनी उपस्थित अधिकारी, कर्मचारी व नागरिकांशी संवाद साधताना देशाच्या प्रगतीसाठी स्वातंत्र्य मूल्यांची जपणूक आणि मूलभूत कर्तव्यांच्या पालनावर विशेष भर देण्यात आला. देशाला स्वातंत्र्य मिळून ८० वर्षे पूर्ण झाली असली, तरी दैनंदिन जीवनातील मूलभूत नागरी कर्तव्ये पार पाडणे हीच खरी देशसेवा असल्याचे या वेळी नमूद करण्यात आले. वाहतुकीच्या नियमांचे काटेकोर पालन करणे, रस्त्यावर कुठेही कचरा न टाकता त्याचे योग्य वर्गीकरण करून तो कचरा गाडीतच देणे, अशा छोट्या-छोट्या नियमांचे नागरिकांनी पालन केले पाहिजे, असे  आवाहन यावेळी त्यांनी आले.

तसेच, प्रशासकीय कामकाजात पारदर्शकता आणि सुलभता आणण्यासाठी अधिकारी व नागरिकांमधील संवाद महत्त्वाचा असून, सर्व अधिकाऱ्यांनी नागरिकांचे प्रश्न समजून घेऊन त्यांची कामे मोकळ्या मनाने व योग्य रीतीने वेळेत पूर्ण करावीत, असेही त्यांनी सांगितले. राष्ट्राच्या सर्वांगीण प्रगतीसाठी सर्वांनी एकजुटीने योगदान देण्याचा संकल्प यावेळी करण्यात आला. या कार्यक्रमाला परिसरातील नागरिक, पालिकेचे अधिकारी आणि कर्मचारी मोठ्या संख्येने उपस्थित होते.

पिंपरी-चिंचवड, दि. १५ ऑगस्ट २०२६ : स्वातंत्र्य दिनानिमित्त निगडी येथील भक्ती-शक्ती परिसरात आयोजित विविध देशभक्तीपर कार्यक्रमांमुळे राष्ट्रप्रेम आणि राष्ट्रीय एकात्मतेचे वातावरण निर्माण झाले. Youvan संस्था आणि पिंपरी-चिंचवड महानगरपालिका यांच्या संयुक्त विद्यमाने आयोजित सामूहिक ‘वंदे मातरम्’ गायन तसेच महानगरपालिकेच्या वतीने आयोजित देशभक्तीपर गीतांच्या कार्यक्रमास महापौर रवि लांडगे यांनी उपस्थित राहून सहभाग नोंदविला.

स्वातंत्र्यलढ्याच्या प्रेरणेचा स्वर — ‘वंदे मातरम्’

बंकिमचंद्र चट्टोपाध्याय यांनी रचलेले ‘वंदे मातरम्’ भारतीय स्वातंत्र्यलढ्यात राष्ट्रप्रेम आणि स्वाभिमान जागविणारे प्रेरणागीत ठरले. स्वातंत्र्य चळवळीच्या विविध टप्प्यांवर या गीताने देशवासीयांना एकत्र आणत मातृभूमीप्रती समर्पणाची भावना दृढ केली. या ऐतिहासिक वारशाचे स्मरण आणि नव्या पिढीमध्ये राष्ट्रप्रेम, राष्ट्रीय एकात्मता व कर्तव्यभावना वृद्धिंगत करण्याच्या उद्देशाने सामूहिक गायनाचे आयोजन करण्यात आले होते.

नागरिक, युवक आणि विद्यार्थ्यांच्या सहभागातून ‘वंदे मातरम्’चे सामूहिक स्वर भक्ती-शक्ती परिसरात घुमले. या उपक्रमाच्या आयोजनाबद्दल महापौर लांडगे यांनी YOUVAN संस्थेचे पदाधिकारी, स्वयंसेवक आणि पिंपरी-चिंचवड महानगरपालिकेचे अभिनंदन केले.

देशभक्तीपर गीतांनी स्वातंत्र्य दिनाचा उत्साह द्विगुणित

याच पार्श्वभूमीवर महानगरपालिकेच्या वतीने आयोजित देशभक्तीपर गीतांच्या कार्यक्रमात विविध कलाकारांनी राष्ट्रप्रेम जागविणाऱ्या गीतांचे सादरीकरण केले. महापालिकेतील प्रशासकीय जबाबदाऱ्या सांभाळतानाच संगीत आणि गायनाची आवड जोपासणाऱ्या अधिकारी-कर्मचाऱ्यांनीही या कार्यक्रमात सहभाग घेतला. त्यांच्या कलागुणांना व्यासपीठ उपलब्ध झाल्याबद्दल महापौर लांडगे यांनी समाधान व्यक्त केले.

कार्यक्रमात बालकलाकार ‘वंडर बॉय’ पृथ्वीराज सतीश इंगळे याने ‘मेरा जूता है जापानी’ हे गीत सादर केले. त्याच्या आत्मविश्वासपूर्ण आणि सुरेल सादरीकरणाला उपस्थितांनी उत्स्फूर्त प्रतिसाद दिला. महापौर लांडगे यांनी पृथ्वीराजचे विशेष कौतुक करून त्याच्या पुढील वाटचालीस शुभेच्छा दिल्या.

“राष्ट्रप्रेमासोबत राष्ट्रविकासाची जबाबदारीही रुजली पाहिजे” — महापौर रवि लांडगे

“स्वातंत्र्य दिन हा स्वातंत्र्यासाठी त्याग आणि बलिदान देणाऱ्या ज्ञात-अज्ञात स्वातंत्र्यसैनिकांप्रती कृतज्ञता व्यक्त करण्याचा दिवस आहे. ‘वंदे मातरम्’च्या सामूहिक स्वरांतून राष्ट्रप्रेम, एकात्मता आणि मातृभूमीप्रती असलेली कृतज्ञता अधोरेखित होते. नव्या पिढीच्या मनात राष्ट्रप्रेमासोबत राष्ट्रविकासातील आपली जबाबदारीही दृढ व्हावी, यासाठी अशा उपक्रमांचे विशेष महत्त्व आहे.”

— रवि लांडगे, महापौर, पिंपरी-चिंचवड महानगरपालिका

कार्यक्रमास आमदार अमित गोरखे, माजी आमदार अश्विनी जगताप, उपमहापौर शर्मिला बाबर, शिवसेना गटनेते विश्वजीत बारणे, नगरसदस्य पंकज भालेकर, अतिश बारणे, जनता व संपर्क अधिकारी प्रफुल्ल पुराणिक यांच्यासह Youvan संस्थेचे पदाधिकारी व स्वयंसेवक, महानगरपालिकेचे अधिकारी-कर्मचारी, कलाकार, विद्यार्थी तसेच नागरिक मोठ्या संख्येने उपस्थित होते.

स्वातंत्र्य दिनाच्या निमित्ताने आयोजित या दोन्ही उपक्रमांतून राष्ट्रभक्ती, राष्ट्रीय एकात्मता, सांस्कृतिक अभिव्यक्ती आणि नव्या पिढीचा सहभाग यांचा प्रभावी संगम अनुभवायला मिळाला.

चिखली- ​गुरुवर्य अकॅडमी स्कूलमध्ये भारताचा ८० वा स्वातंत्र्यदिन अत्यंत उत्साह, अभिमान आणि देशभक्तीच्या वातावरणात साजरा करण्यात आला. या प्रसंगी विद्यार्थी, शिक्षक, पालक तसेच मान्यवर अतिथींनी उत्स्फूर्त सहभाग नोंदवून स्वातंत्र्यसैनिकांच्या त्यागाचे आणि बलिदानाचे भावपूर्ण स्मरण केले. कार्यक्रमाची सुरुवात मान्यवरांच्या हस्ते ध्वजारोहण करून झाली. त्यानंतर ‘वंदे मातरम्’, राष्ट्रगीत, ध्वजगीत आणि राज्यगीताच्या सुमधुर सादरीकरणाने संपूर्ण परिसर देशभक्तीच्या भावनेने भारावून गेला. या सोहळ्यास प्रमुख पाहुणे म्हणून सुभेदार दत्तात्रय गायकवाड, पोलीस हवालदार आनंद झुंगारे आणि अग्निशमन दलाचे अधिकारी किरण वाघमारे (COD) यांची विशेष उपस्थिती लाभली. तसेच शाळेचे संचालक भूषण मावळे सहसंस्थापक व सचिव अनिल बेलकेरी , कोषाध्यक्ष प्रसाद शेट्टी, मुख्याध्यापिका  ज्योत्स्ना मावळे, ज्योती बेलकेरी, शुभा शेट्टी यांच्यासह सर्व विश्वस्त आवर्जून उपस्थित होते.

​ध्वजारोहणानंतर शाळेच्या प्रांगणात विद्यार्थ्यांनी विविध सांस्कृतिक कार्यक्रम सादर केले. स्वातंत्र्यसैनिकांचा संघर्ष, शौर्य आणि त्याग प्रभावीपणे मांडणाऱ्या देशभक्तीपर नाट्यछटा, सुमधुर राष्ट्रभक्तीपर गीते आणि अंगावर शहारे आणणाऱ्या जोशपूर्ण मर्दानी खेळांच्या प्रात्यक्षिकांनी उपस्थितांची मने जिंकून घेतली. यानंतर विद्यार्थी आणि शिक्षकांनी स्वातंत्र्य, लोकशाहीची मूल्ये व नागरिकांची कर्तव्ये यावर आपली मनोगते व्यक्त केली. यावेळी विद्यार्थ्यांनी एकता, शिस्त, प्रामाणिकपणा, समानता आणि सक्षम राष्ट्र घडविण्याची प्रतिज्ञा घेत विशेष शपथविधी पूर्ण केला. उपस्थित पाहुण्यांनी विद्यार्थ्यांच्या शिस्त, आत्मविश्वास आणि सादरीकरणाचे भरभरून कौतुक करत त्यांना देशसेवेसाठी प्रेरित केले.

​हा सोहळा यशस्वी करण्यासाठी शाळेचे संचालक श्री. भूषण मावळे आणि मुख्याध्यापिका श्रीमती ज्योत्स्ना मावळे यांचे बहुमूल्य मार्गदर्शन लाभले. तसेच समन्वयक  प्रतिभा पाटील,  मोहना पंगनूरवार यांच्यासह नृत्य शिक्षिका  प्रीती, संगीत शिक्षिका  वर्षा आहेरकर, कला शिक्षिका सारिका चव्हाण, कांचन शिंदे आणि क्रीडा शिक्षिक मनीषा खेडकर, प्रफुल्ल प्रधान, सागर चव्हाण यांनी विद्यार्थ्यांच्या पूर्वतयारीसाठी विशेष परिश्रम घेतले. 

पालक, शिक्षक आणि शिक्षकेतर कर्मचाऱ्यांच्या सक्रिय सहभागाने आणि समर्पित प्रयत्नांमुळे हा ८० वा स्वातंत्र्यदिन सोहळा अत्यंत देखणा, प्रेरणादायी आणि संस्मरणीय ठरला.

चऱ्होली: अ‍ॅपेक्स स्कूल अ‍ॅण्ड ज्युनियर कॉलेज, चऱ्होली येथे देशाचा ८० वा स्वातंत्र्यदिन उत्साहात साजरा करण्यात आला. या कार्यक्रमाला  लेफ्टनंट कर्नल अमोल धुमाळ, माजी महापौर नितीन काळजे, नगरसेवक सचिन तापकीर, माजी नगरसेविका विनया तापकीर, संत तुकाराम सहकारी साखर कारखान्याचे संचालक अतुल काळजे, माजी संचालक प्रवीण काळजे, सामाजिक कार्यकर्ते प्रकाश काळजे, संतोष पठारे, गणेश तापकीर, सोमनाथ घारे, सतीश पठारे आणि भाऊसाहेब रासकर यांची प्रमुख उपस्थिती लाभली.

 ‘वंदे मातरम्’च्या जयघोषाने कार्यक्रमाची सुरुवात झाली. ध्वजारोहण व राष्ट्रगीत झाले. यावेळी विद्यार्थ्यांनी शिस्तबद्ध संचलन करत  ध्वजास मानवंदना दिली. यावेळी विद्यार्थ्यांनी देशभक्तीपर गीते, नृत्य आणि नाट्यप्रयोग सादर केले. विद्यार्थ्यांच्या कराटे प्रात्यक्षिकांनी, कॅलिस्थेनिक व्यायाम प्रकारांनी तसेच लाठी-काठीच्या सादरीकरणाने उपस्थितांची मने जिंकली. विद्यार्थ्यांचा आत्मविश्वास, शारीरिक कौशल्य आणि शिस्त यांचे दर्शन या सादरीकरणातून घडले. या प्रसंगी विद्यार्थ्यांना ट्रॅकसूटचे वितरणही करण्यात आले. याप्रसंगी संस्थेचे संस्थापक संतोष काळजे, दत्तात्रय वाळके, गणेश ठोकळ, राहुल टोणगे, मुख्याध्यापिका डॉ. मानसी गिल पंडित, उपमुख्याध्यापिका लीना तुगडे, विभागप्रमुख नीलम टोणगे आणि बालवाटिका विभागप्रमुख कोमल कदम उपस्थित होते.

 लेफ्टनंट कर्नल अमोल धुमाळ यांनी विद्यार्थ्यांना मार्गदर्शन करताना देशप्रेम, शिस्त, कर्तव्यभावना आणि राष्ट्राच्या प्रगतीतील योगदानाचे महत्त्व स्पष्ट केले. मुख्याध्यापिका डॉ. मानसी गिल पंडित यांनी स्वातंत्र्याचे महत्त्व अधोरेखित करत शिक्षणासोबतच संस्कार, शिस्त आणि जबाबदार नागरिकत्वाचे मूल्य आत्मसात करण्याचे आवाहन केले. यानंतर शिक्षकांचे मनोगत व विश्वस्तांचे मार्गदर्शन झाले. मान्यवरांनी विद्यार्थ्यांच्या कलागुणांचे कौतुक करत त्यांना पुढील वाटचालीस शुभेच्छा दिल्या.

​भोसरी-  विद्यार्थ्यांच्या सर्वांगीण  विकासासाठी कायमच नाविन्यपूर्ण उपक्रम राबवणाऱ्या नामांकित एसपीजी इंटरनॅशनल पब्लिक स्कूलमध्ये  भारताचा ८० वा स्वातंत्र्य दिन अत्यंत दिमाखदार, शिस्तबद्ध आणि देशभक्तीमय वातावरणात  उत्साहात साजरा करण्यात आला. या  कार्यक्रमासाठी प्रमुख पाहुणे म्हणून नगरसेवक मा. श्री. सागर बाळासाहेब गवळी उपस्थित होते, तर कार्यक्रमाचे अध्यक्षस्थान मा. श्री. पांडुरंग नाना गवळी व मा. सौ. सुनीतामाई पांडुरंग नाना गवळी यांनी भूषविले. मा. स्वप्नील पांडुरंग गवळी, मा. सौ. कोमल स्वप्नील गवळी आणि मा. संकल्प पांडुरंग गवळी यांच्या कुशल मार्गदर्शनाखाली या संपूर्ण सोहळ्याचे नेटके नियोजन करण्यात आले होते.

​कार्यक्रमाच्या सुरुवातीला ध्वजारोहणानंतर विद्यार्थ्यांचे विविध सांस्कृतिक कार्यक्रम पार पडले. यामध्ये इयत्ता ५ वी आणि ७ वीच्या विद्यार्थ्यांनी सादर केलेली देशभक्तीपर नृत्ये आणि श्री. विकी सर व श्री. सोहम सर यांच्या मार्गदर्शनाखाली विद्यार्थ्यांनी सादर केलेली शिस्तबद्ध परेड यांनी उपस्थितांची मने जिंकली. विद्यार्थ्यांना नृत्यासाठी सौ. रुपाली ससाणे, श्री. विकी सर, प्रेमलता मॅडम आणि भावना मॅडम यांचे विशेष मार्गदर्शन लाभले. याप्रसंगी कॉलेजच्या प्राचार्या सौ. वैशाली यादव यांनी विद्यार्थ्यांना देशसेवेची प्रेरणा देणारे विचार मांडले.

​या सोहळ्याचे औचित्य साधून शैक्षणिक वर्ष २०२५-२६ मध्ये इयत्ता १० वी आणि १२ वीच्या परीक्षेत ९० टक्क्यांहून अधिक गुण मिळवणाऱ्या गुणवंत विद्यार्थ्यांचा सन्मानचिन्ह देऊन विशेष सन्मान करण्यात आला. त्याचप्रमाणे १० वीच्या उत्कृष्ट निकालासाठी अहोरात्र मेहनत घेणाऱ्या शिक्षकांनाही सन्मानचिन्ह देऊन गौरविण्यात आले. एकता जाधव मॅडम आणि निशा वाघमारे मॅडम यांनी केलेल्या आकर्षक सजावटीने संपूर्ण परिसर देशभक्तीच्या रंगात न्हाऊन निघाला होता.

​कार्यक्रमाच्या यशस्वितेसाठी स्कूलचे प्राचार्य डॉ. प्रवीण गायकवाड, सौ. सुप्रिया मुळे, सौ. तैसीन मुलाणी, रेहान सर, डॉ. जयश्री सुरवसे यांच्यासह शिक्षक व शिक्षकेतर कर्मचाऱ्यांचे मोलाचे सहकार्य लाभले. संपूर्ण कार्यक्रमाचे प्रभावी व ओघवत्या शैलीतील सूत्रसंचालन सौ. मनीषा चव्हाण आणि सौ. अश्विनी मांजरेकर यांनी केले. शिस्त, संस्कृती आणि उत्साहाचा अनोखा संगम असलेला हा स्वातंत्र्य दिन सोहळा उपस्थितांसाठी अविस्मरणीय ठरला.

भाजपा आमदार महेश लांडगे यांच्या पाठपुराव्याला प्रशासनाचे बळ

पिंपरी- चिंचवड । प्रतिनिधी |

पिंपरी-चिंचवडसह चाकण आणि खेडच्या औद्योगिक पट्ट्याच्या दृष्टीने अत्यंत महत्त्वाच्या असलेल्या नाशिक फाटा–खेड एलिव्हेटेड कॉरिडॉरच्या प्रत्यक्ष अंमलबजावणीला आता गती मिळाली आहे. या प्रकल्पासाठी नगरविकास विभागाकडून आज मार्गाचे मार्किंग सुरू झाले असून, भूसंपादन प्रक्रियेलाही वेग आला आहे. या पार्श्वभूमीवर प्रकल्पासाठी सातत्याने पाठपुरावा भाजपाचे आमदार महेश लांडगे यांच्या प्रयत्नांना बळ मिळाले आहे.

नाशिक फाटा–खेड एलिव्हेटेड कॉरिडॉर हा केवळ वाहतूक कोंडी सोडविणारा प्रकल्प नसून पुणे–पिंपरी-चिंचवड–चाकण–खेड या संपूर्ण औद्योगिक पट्ट्याच्या विकासाला गती देणारी महत्त्वाची पायाभूत सुविधा आहे. या मार्गामुळे नाशिक फाटा, भोसरी, मोशी, चाकण आणि खेड परिसरातील वाढत्या वाहतुकीचा ताण कमी करण्यास मदत होणार आहे.

केंद्रीय मंत्री नितीन गडकरी यांनी या महत्त्वाकांक्षी प्रकल्पाला मंजुरी दिल्यानंतर त्याची अंमलबजावणी वेगाने व्हावी, यासाठी आमदार महेश लांडगे यांनी सातत्याने पाठपुरावा केला. मुख्यमंत्री देवेंद्रजी फडणवीस यांच्या नेतृत्वाखाली प्रकल्पाचे भूसंपादन पूर्ण करून प्रत्यक्ष कामाला सुरुवात व्हावी, यासाठी संबंधित यंत्रणांशी समन्वय साधत प्रकल्पाला गती देण्याची भूमिका त्यांनी घेतली. तसेच, विधानसभा अधिवेशनातही हा मुद्दा सातत्त्याने लावून धरला आहे.

आता नगरविकास विभागाकडून मार्गाचे मार्किंग सुरू झाल्याने आणि भूसंपादन प्रक्रियेला वेग मिळाल्याने लांडगे यांच्या पाठपुराव्याला प्रत्यक्ष प्रशासकीय गती मिळाल्याचे चित्र आहे. चाकण औद्योगिक पट्ट्यात ऑटोमोबाईल, इंजिनिअरिंग, उत्पादन आणि लॉजिस्टिक्स क्षेत्रातील मोठ्या उद्योगांची संख्या आहे. मात्र, वाढती वाहतूक कोंडी आणि अपुरी रस्ते क्षमता यामुळे उद्योगांच्या वाहतूक व्यवस्थेवर मोठा परिणाम होत आहे.  एलिव्हेटेड कॉरिडॉरमुळे लांब पल्ल्याची वाहतूक अधिक वेगाने पुढे जाण्यास मदत होणार असून, उद्योगांसाठी वेळ, इंधन आणि लॉजिस्टिक्स खर्चात बचत होण्याची शक्यता आहे. त्यामुळे चाकणच्या औद्योगिक विकासासाठी हा प्रकल्प ‘गेमचेंजर’ ठरणार असल्याचे लांडगे यांनी अधोरेखित केले आहे.

पुणे–नाशिक आर्थिक कॉरिडॉरला नवी ताकद

नाशिक फाटा–खेड मार्गामुळे केवळ पिंपरी-चिंचवडची वाहतूक कोंडी कमी होणार नाही, तर पुणे–नाशिक आर्थिक पट्ट्याची वाहतूक क्षमता वाढणार आहे. नवीन उद्योग, लॉजिस्टिक्स पार्क, वेअरहाऊसिंग आणि रोजगारनिर्मितीसाठी आवश्यक पायाभूत सुविधा निर्माण करण्याच्या दृष्टीने हा प्रकल्प महत्त्वाचा आहे. “हा केवळ फ्लायओव्हर नाही, तर पिंपरी-चिंचवडपासून चाकण-खेडपर्यंतच्या औद्योगिक विकासाचा वाहतूक-कणा आहे. मार्किंग सुरू होणे आणि भूसंपादनाला गती मिळणे हे प्रकल्पाच्या प्रत्यक्ष अंमलबजावणीच्या दिशेने महत्त्वाचे पाऊल आहे. पुढील टप्प्यात भूसंपादन प्रक्रिया पूर्ण करून प्रत्यक्ष बांधकामाला गती मिळावी, यासाठीही आपला पाठपुरावा सुरूच राहणार असल्याचे आमदार महेश लांडगे यांनी स्पष्ट केले.

“नाशिक फाटा–खेड एलिव्हेटेड कॉरिडॉर हा केवळ वाहतूक कोंडी सोडविणारा प्रकल्प नाही, तर पिंपरी-चिंचवड, चाकण आणि खेडच्या औद्योगिक विकासाला नवी गती देणारा महत्त्वाचा वाहतूक-कणा आहे. केंद्रीय मंत्री नितीन गडकरी यांनी या प्रकल्पाला मंजुरी दिल्यानंतर मुख्यमंत्री देवेंद्र फडणवीस यांच्या नेतृत्वाखाली प्रकल्पाचे भूसंपादन आणि प्रत्यक्ष कामाला सुरुवात व्हावी, यासाठी आम्ही सातत्याने पाठपुरावा करत आहोत. आज नगरविकास विभागाकडून मार्किंग सुरू झाले असून भूसंपादन प्रक्रियेलाही गती मिळाली आहे. हा प्रकल्प लवकरात लवकर प्रत्यक्षात यावा आणि पुणे महानगर प्रदेशाच्या विकासाला नवी दिशा मिळावी, यासाठी आमचा पाठपुरावा यापुढेही कायम राहील.”
- महेश लांडगे, आमदार, भाजपा, पिंपरी-चिंचवड, पुणे.

पुणे : अन्न व औषध प्रशासनाने पुणे, पिंपरी-चिंचवडमधील हॉटेल, बेकरी, रेस्टॉरंट यांची तपासणी केली असता, नियमांचे उल्लंघन करणाऱ्या सहा आस्थापनांचे परवाने निलंबित केले. याशिवाय कोंढवा बुद्रुक परिसरात विनापरवाना वाहतूक केला जाणारा ५९८ किलो मीठा मावा जप्त केला असून, त्याची किंमत सुमारे दीड लाख रुपये आहे.
या विशेष मोहिमेत हॉटेल, रेस्टॉरंट, बेकरी तसेच विविध खाद्यपदार्थ विक्री केंद्रांची तपासणी करण्यात आली. यादरम्यान काही आस्थापनांमध्ये अस्वच्छता, मुदत संपलेले खाद्यपदार्थ साठवून ठेवणे, तसेच अन्न सुरक्षा व मानके कायद्यातील नियमांचे उल्लंघन आढळून आले.
ग्राहकांच्या आरोग्याला धोका निर्माण होण्याची शक्यता असलेल्या या प्रकारांची गंभीर दखल घेत आस्थापनांवर कारवाई करण्यात आली. त्याचबरोबर सांगली जिल्ह्यातही कारवाई केली असून, तेथील हॉटेलांवर कारवाई केली आहे.

पिंपरी, 14 ऑगस्ट  (प्रतिनिधी) : पिंपरी-चिंचवड महापालिकेच्या अधिकारी व कर्मचाऱ्यांना यंदा वाढीव सानुग्रह अनुदान मिळण्याचा मार्ग मोकळा झाला आहे. अधिकारी व कर्मचाऱ्यांना दरवर्षी देण्यात येणारा ८.३३ टक्के प्रथा बोनस आणि २५ हजार रुपयांचे सानुग्रह अनुदान यामध्ये वाढ करून आता ३० हजार रुपये सानुग्रह अनुदान देण्याच्या प्रस्तावाला स्थायी समितीने उपसूचनेसह मंजुरी दिली आहे.

सन २०२५-२६ ते २०२९-३० या पाच वर्षांसाठी बोनस व सानुग्रह अनुदान देण्याचा करारनामा करण्यास तसेच त्यासाठी होणाऱ्या खर्चास स्थायी समितीने मान्यता दिली आहे. उपसूचनेसह हा प्रस्ताव अंतिम मंजुरीसाठी सर्वसाधारण सभेकडे पाठविण्यात आला आहे.

महापालिका आस्थापनेवरील सर्व अधिकारी व कर्मचारी, शिक्षण विभागातील अधिकारी व कर्मचारी, वैद्यकीय विभागातील अधिकारी व कर्मचारी तसेच निवृत्त अधिकारी व कर्मचाऱ्यांनाही नियमानुसार प्रथा बोनस व सानुग्रह अनुदानाचा लाभ दिला जातो. त्यानुसार ८.३३ टक्के प्रथा बोनसासोबत पूर्वी २५ हजार रुपये सानुग्रह अनुदान देण्याची तरतूद होती. मात्र, स्थायी समितीने उपसूचना मंजूर करून ही रक्कम २५ हजारांवरून ३० हजार रुपये करण्यास मान्यता दिली आहे.

या निर्णयामुळे महापालिका अधिकारी व कर्मचाऱ्यांना मोठा आर्थिक दिलासा मिळणार असून, त्यांच्या कुटुंबीयांचीही यंदाची दिवाळी अधिक आनंदात साजरी होणार आहे. अंतिम मंजुरीनंतर वाढीव सानुग्रह अनुदानाचा लाभ कर्मचाऱ्यांना मिळणार आहे.

पिंपरी-चिंचवड | प्रतिनिधी

हिंजवडी आयटी हब तसेच तळेगाव-चाकण-खेड औद्योगिक पट्ट्यातील वाढती वाहतूक कोंडी आणि पायाभूत सुविधांच्या प्रश्नांवर आता संघटितपणे पाठपुरावा करण्याचा निर्णय घेण्यात आला आहे. भाजपा आमदार महेश लांडगे यांच्या पुढाकारातून ‘अनलॉग हिंजवडी’, पिंपरी-चिंचवड गृहनिर्माण सोसायटी महासंघ (फेडरेशन), फोरम फॉर आयटी एम्प्लॉई, चाकण एमआयडीसी उद्योजक संघटना आणि ट्रॅफिकमुक्त चाकण कृती समितीच्या प्रतिनिधींसोबत सविस्तर बैठक घेण्यात आली.

हिंजवडी आयटी हब आणि तळेगाव-चाकण-खेड औद्योगिक पट्टा हा पुणे महानगर प्रदेशाच्या आर्थिक विकासाचा महत्त्वाचा कणा आहे. मात्र, अपुऱ्या रस्ते सुविधा, वाढती वाहनसंख्या, भूसंपादनातील अडथळे, अतिक्रमणे आणि प्रशासकीय समन्वयाचा अभाव यामुळे या भागातील वाहतूक कोंडी दिवसेंदिवस गंभीर होत आहे. उद्योग, रोजगार आणि गुंतवणुकीवर परिणाम होऊ नये, यासाठी दीर्घकालीन आणि एकत्रित उपाययोजना करण्याची गरज असल्याचे आमदार लांडगे यांनी स्पष्ट केले.

जून २०२५ मध्ये मुख्यमंत्री देवेंद्र फडणवीस यांच्या उपस्थितीत या प्रश्नावर बैठक नियोजित करण्यात आली होती. त्यावेळी मुख्यमंत्र्यांनी विभागीय आयुक्तांची ‘नोडल अधिकारी’ म्हणून नियुक्ती केली होती. त्यानंतर वाहतूक सुसूत्रीकरणासाठी प्रशासनाकडून काही उपाययोजनांना सुरुवात झाली. मात्र, भूसंपादन, अतिक्रमणे, तांत्रिक अडचणी आणि प्रशासकीय संथगतीमुळे अनेक कामांना अपेक्षित वेग मिळालेला नसल्याचे बैठकीत निदर्शनास आणून देण्यात आले.

‘इंडस्ट्रियल टाउनशिप’चा व्यापक दृष्टिकोन

हिंजवडीसह तळेगाव-चाकण-खेड औद्योगिक क्षेत्राचा केवळ वाहतूक कोंडी सोडविण्यापुरता विचार न करता, या संपूर्ण परिसराचा ‘इंडस्ट्रियल टाउनशिप’ म्हणून नियोजनबद्ध विकास करण्याची गरज बैठकीत व्यक्त करण्यात आली.

उद्योगांना आवश्यक रस्ते, सार्वजनिक वाहतूक, वीज, पाणी, नागरी सुविधा आणि वाहतूक व्यवस्थापन यांचा एकात्मिक आराखडा तयार झाल्यास या भागातील उद्योग आणि रोजगाराला मोठी चालना मिळू शकते, असा मुद्दा मांडण्यात आला.

अराजकीय समन्वय समितीचा प्रस्ताव

वाहतूक प्रश्न हा कोणत्याही एका पक्षाचा किंवा संस्थेचा विषय नसून नागरिक, कामगार, उद्योजक आणि प्रशासनाशी संबंधित आहे. त्यामुळे नोडल अधिकाऱ्यांच्या अध्यक्षतेखाली अराजकीय समन्वय समिती स्थापन करण्याचा प्रस्ताव पुढे आला.

या समितीच्या माध्यमातून प्रलंबित कामांचा नियमित आढावा, कामांचा वेग व दर्जा तसेच आवश्यक भूसंपादनाचा पाठपुरावा करण्याचे निश्चित करण्यात आले.

मुख्यमंत्र्यांसोबत पुन्हा बैठक

बैठकीतील प्रमुख मुद्दे मुख्यमंत्री देवेंद्र फडणवीस यांच्यासमोर मांडून त्यांच्यासोबत पुन्हा बैठक घेण्याचा निर्धार करण्यात आला. प्रस्तावित रस्त्यांसाठी आवश्यक भूसंपादनाबाबत नागरिकांमध्ये जनजागृती करणे, वाहतूक पोलीस व वॉर्डनचे मनुष्यबळ वाढविणे तसेच ग्रामपंचायत आणि स्थानिक स्वराज्य संस्थांमध्ये समन्वय साधण्यावरही भर देण्यात आला.

बैठकीत या मुद्द्यांवर झाली चर्चा

1. आयटी व औद्योगिक क्षेत्रातील वाहतूक कोंडीवर ठोस उपाययोजना निश्चित करणे.
2. नोडल अधिकाऱ्यांच्या अध्यक्षतेखाली अराजकीय समन्वय समिती स्थापन करण्याचा प्रस्ताव.
3. मुख्यमंत्री देवेंद्र फडणवीस यांच्यासोबत पुन्हा बैठक घेणे.
4. सुरू असलेल्या कामांचा दर्जा आणि वेग याबाबत नियमित ‘क्वालिटी कंट्रोल’ व पाठपुरावा.
5. प्रस्तावित रस्त्यांसाठी भूसंपादन प्रक्रियेला गती देणे.
6. वाहतूक पोलीस व वॉर्डनचे मनुष्यबळ वाढविण्याचा पाठपुरावा.
7. ग्रामपंचायत व स्थानिक स्वराज्य संस्थांमध्ये समन्वय साधून एकत्रित कृती आराखडा तयार करणे.

“हिंजवडी आयटी हब आणि तळेगाव-चाकण-खेड औद्योगिक पट्टा हा केवळ पुणे जिल्ह्याचा नव्हे, तर संपूर्ण महाराष्ट्राच्या औद्योगिक विकासासाठी महत्त्वाचा आहे. वाहतूक कोंडीमुळे उद्योग, कामगार आणि नागरिकांना त्रास होणार असेल, तर ही परिस्थिती स्वीकारता येणार नाही. शासन, प्रशासन, उद्योजक, नागरिक आणि विविध संघटनांना सोबत घेऊन ठोस, कालबद्ध आणि परिणामकारक उपाययोजना करण्यासाठी आमचा सातत्यपूर्ण पाठपुरावा राहील. पुणे महानगर प्रदेश (PMR) ला वाहतूक कोंडीमुक्त आणि उद्योगस्नेही बनविण्यासाठी सर्वांनी एकत्रितपणे काम करण्याचा हा संकल्प आहे.”

— महेश लांडगे, आमदार, भाजपा, पिंपरी-चिंचवड, पुणे

पिंपरी-चिंचवड | पिंपरी-चिंचवड महानगरपालिकेने मोठ्या गृहनिर्माण सोसायट्यांकडून ओला कचरा उचलण्यास नकार देणाऱ्या निर्णयाला अखेर मवाळ भूमिका घेत, ओला कचरा पूर्ववत उचलण्याचा निर्णय घेतला आहे. या निर्णयामागे पिंपरी-चिंचवड चाकण हाऊसिंग सोसायटी संघटनेने केलेला सातत्यपूर्ण पाठपुरावा, प्रशासनाशी झालेल्या बैठका, विविध अधिकाऱ्यांना दिलेली निवेदने आणि आंदोलनाचा दिलेला इशारा महत्त्वाचा ठरल्याची भावना संघटनेने व्यक्त केली आहे.

संघटनेने या विषयावर महापालिका आयुक्त, अतिरिक्त आयुक्त, आरोग्य विभाग तसेच संबंधित अधिकाऱ्यांची भेट घेऊन सोसायट्यांच्या अडचणी सविस्तर मांडल्या होत्या. शहरातील अनेक सोसायट्यांकडे कंपोस्टिंग प्रकल्पासाठी आवश्यक जागा नसल्याने हा निर्णय व्यवहार्य नसल्याचे संघटनेने ठामपणे मांडले होते. तसेच गरज पडल्यास लोकशाही मार्गाने आंदोलन छेडण्याचाही इशारा देण्यात आला होता.

या सर्व प्रयत्नांनंतर महापालिका प्रशासनाने निर्णयात बदल करून सोसायट्यांचा ओला कचरा पूर्ववत उचलण्याचा निर्णय घेतला आहे. या निर्णयाचे संघटनेने स्वागत केले असून, प्रशासनाने नागरिकांच्या भावना आणि अडचणींचा सकारात्मक विचार केल्याबद्दल समाधान व्यक्त केले आहे.

“हा केवळ आमच्यासंघटनेचा विजय नसून पिंपरी-चिंचवडमधील हजारो हाऊसिंग सोसायट्या आणि लाखो नागरिकांच्या एकजुटीचा विजय आहे. आम्ही सुरुवातीपासूनच पर्यावरण संवर्धनाला विरोध केला नाही; मात्र व्यवहार्य अंमलबजावणीची मागणी केली. प्रशासनाने आमचे म्हणणे ऐकून सकारात्मक निर्णय घेतल्याबद्दल आम्ही त्यांचे स्वागत करतो. भविष्यातही नागरिकांच्या हितासाठी संघटना अशाच पद्धतीने ठामपणे आवाज उठवत राहील.”
- सत्यब्रत त्रिपाठी, अध्यक्ष, पिंपरी-चिंचवड चाकण हाऊसिंग सोसायटी

पिंपरी-चिंचवड । प्रतिनिधी : ‘‘महाराष्ट्र उद्योग भूषण पुरस्कार’’ हा केवळ वैयक्तिक सन्मान नसून संपूर्ण उद्योगविश्वासाठी प्रेरणादायी टप्पा आहे. उत्पादन, कौशल्य विकास आणि तंत्रज्ञानाच्या बळावर महाराष्ट्र $1 ट्रिलियन अर्थव्यवस्थेकडे वाटचाल करत असून, या प्रवासात उद्योग क्षेत्राची भूमिका अत्यंत महत्त्वाची आहे,’’ असे प्रतिपादन ‘‘ॲल्युमिनिअम मॅन ऑफ इंडिया’’ म्हणून ओळखले जाणारे प्रसिद्ध उद्योजक भरत गीते यांनी केले.

पिंपरी-चिंचवडमध्ये उद्योग, समाजसेवा आणि प्रेरणादायी कार्याला प्रोत्साहन देण्यासाठी एक्सप्रेस मीडिया इंटरप्राईसचा भव्य सोहळा आयोजित करण्यात आला. कार्यक्रमाची सुरुवात  के. राहूल यांच्या गायनाने झाली, त्यानंतर गुरुवर्य ॲकॅडेमी स्कूलच्या विद्यार्थ्यांनी गणेश वंदना सादर केली.

सोहळ्याचे औपचारिक उद्घाटन दीप प्रज्वलनाने करण्यात आले, त्यानंतर मान्यवरांचा सन्मान करण्यात आला. उपस्थित मान्यवरांमध्ये  जेष्ठ अभिनेते व नाम फाऊंडेशनचे संस्थापक मा. मकरंद अनासपुरे, संसदरत्न खासदार मा. श्रीरंग बारणे, महापौर रवी लांडगे, प्रमुख प्रायोजक कुमार लाईफस्पेसेसचे संचालक मा. अमेय जैन आणि उद्योगक्षेत्रातील मा. भरत गीते, महावितरण चे कार्यकारी संचालक धनंजय औंढेकर, शिवसेनेचे मुख्य सचिव वैभव थोरात, राष्ट्रवादीच्या शहराध्यक्ष कविता अल्हाट, नगरसेविका सुलभा उबाळे, नगरसेवक अनंत कोऱ्हाळे यांचा समावेश होता. यावेळी उद्योजक भारत गीते यांची प्रकट मुलाखत घेण्यात आली. त्यांच्या मुलाखतीमध्ये उपस्थित विद्यार्थी, श्रोत्यांना प्रेरणा मिळाली.

सोहळ्यात उद्योगक्षेत्रातील उल्लेखनीय योगदानाबद्दल उद्योजक आणि ‘‘ॲल्युमिनियम मॅन ऑफ इंडिया’’ म्हणून ओळखले जाणारे मा. भरत गीते यांना महाराष्ट्र उद्योग भूषण पुरस्कार प्रदान करण्यात आला. त्यानंतर उर्वरित विशेष पुरस्कारांचे वितरण करण्यात आले.

संचालिका मनीषा थोरात-पिसाळ यांनी आपल्या भाषणात संस्थेची ओळख, सामाजिक बांधिलकीसाठी पुरस्काराचे महत्त्व, कुटुंबाचा आधार आणि प्रेरणादायी संदेश यावर भर दिला. त्यांनी सांगितले की, दृढनिश्चय, प्रामाणिकपणा, मेहनत आणि समाजासाठी योगदान हेच खरे यश निर्माण करतात. तसेच उपस्थितांना संदेश दिला की, प्रत्येक अडचणीत धैर्याने सामना करावा आणि मेहनत व विश्वासाने स्वप्न पूर्ण करावेत.

सोहळ्यात रमा-मंगल फाउंडेशनचे संस्थापक संतोष सौंदणकर यांच्यासह  अनेक मान्यवरांचे सहकार्य होते. कार्यक्रमाचे मुख्य प्रायोजक कुमार लाईफ स्पेसेस, विठ्ठल हॉस्पिटल मोशी, धनश्री हॉस्पिटल, लोटस ग्रुप, रिव्हर नेस्ट, पार्श्व रिॲलिटी, वृंदा लाईफस्पेसेस, सोनिगरा क्रॉप अशा प्रमुख प्रायोजकांचा सन्मान करण्यात आला. कार्यक्रमाच्या शेवटी जेष्ठ अभिनेते मा. मकरंद अनासपुरे,  महापौर रवी लांडगे यांनी आपले मनोगत व्यक्त केले, तर आभार प्रदर्शन मा. संतोष सौंदणकर यांनी केले. सोहळा प्रेरणादायी ठरला आणि समाजातील प्रेरक व्यक्तिमत्त्वांचा योग्य सन्मान करण्यात यश मिळाले.

पुरस्कारार्थींची नावे पुढीलप्रमाणे : 

भरतजी गीते (महाराष्ट्र उद्योग भूषण पुरस्कार), वैभव थोरात (शिक्षणमहर्षी), विठ्ठल हॉस्पिटल, मोशी (महाराष्ट्र धन्वंतरी गौरव पुरस्कार), रविंद्र दत्तात्रय ठिकेकर (यशस्वी उद्योजक पुरस्कार), संदीप बेलसरे (उद्योग नवोन्मेष पुरस्कार), सुनील काकडे (मुख्य अभियंता महावितरण) (कार्यगौरव पुरस्कार), नितीन सूर्यवंशी (कार्यगौरव पुरस्कार), दीपक अशोक माने (सामाजिक कार्यगौरव),  डॉ. जयश्री सुरवसे (द्रोणाचार्य पुरस्कार), ज्योत्स्ना भूषण मावळे (मानसशक्ती पुरस्कार), नवनाथ ढवळे (शिक्षण रत्न पुरस्कार), वंदना चौव्हाण (नारीशक्ती कार्यगौरव), मराठवाडा युवा मंच (सामाजिक कार्यगौरव), समर्थ महिला बहुउद्देशीय (महिला सशक्तीकरण कार्यगौरव), नीता पाडाळे (आदर्श नगरसेविका),  प्रिती बोंडे(उत्कृष्ट व्यक्तिमत्व), केसर ग्रुप (उत्कृष्ट बांधकाम व्यावसायिक), विश्वकल्याण इंग्लिश मिडीयम स्कूल (ज्ञानदीप गौरव पुरस्कार), जाणीव परिवार (मोशी) (सामाजिक कार्यगौरव), आपला परिवार सोशल फाउंडेशन (पर्यावरण संवर्धन कार्यगौरव), शिवयोद्धा ग्रुप (महाराष्ट्र शिवविचार गौरव).

"उद्योग म्हणजे फक्त नफा नाही; ते समाजासाठी, लोकांसाठी आणि पुढील पिढीसाठी नवीन संधी निर्माण करण्याचे माध्यम आहे. दृढनिश्चय, प्रामाणिकपणा आणि मेहनत यांवर टिकून राहिल्यास यश आपोआप आपल्यासमोर येते."
- भरत गीते, महाराष्ट्र उद्योग भूषण. 

"जगण्यासाठी फक्त स्वप्ने पाहणे पुरेसे नाही, ती स्वप्ने प्रत्यक्षात आणण्यासाठी प्रयत्न, धैर्य आणि समाजाची सेवा आवश्यक आहे. प्रत्येक कृतीत समाजाला काही तरी देण्याचा विचार असावा, मग यश आपोआप पाठलाग करते."
- मकरंद अनासपुरे, ज्येष्ठ अभिनेता.

पिंपरी- चिंचवड: शहरात किती विकास कामे केले, नवीन प्रकल्प राबविले यापेक्षा पाणी, स्वच्छता, आरोग्य, स्वच्छता या मुलभूत सुविधा किती सक्षमपणे दिल्या जातात हे महत्वाचे आहे. त्यामुळे मोठ्या प्रकल्पांपेक्षा मुलभूत सुविधा मुबलक प्रमाणात देण्यावर भर द्यावा. नागरिकांना पुरेसे, स्वच्छ पाणी मिळाले पाहिजे. रावेत, निघोजे बंधाऱ्यातून उचलण्यात येणारे पाणी अतिशय अशुद्ध आहे. त्यामुळे शिवणेतील बंधाऱ्यातून पाणी उचलण्यात यावे, असे निर्देश शिवसेना खासदार श्रीरंग बारणे यांनी महापालिका अधिकाऱ्यांना दिले.

शहरातील विविध प्रश्नांसंदर्भात खासदार बारणे

यांनी सोमवारी महापालिका आयुक्त विजय सूर्यवंशी यांच्याबरोबर आढावा बैठक घेतली. अतिरिक्त आयुक्त विजयकुमार खोराटे, विक्रांत बगाडे, तृप्ती सांडभोर, मुख्य लेखा आधिकारी प्रविण जैन, उपायुक्त ममता शिंदे, मुख्य अभियंता प्रमोद ओंभासे,  संजय कुलकर्णी, आरोग्य वैद्यकीय अधिकारी डॉ. लक्षण गोफणे, नगररचना उपसंचालक  किशोर गोखले, सह आयुक्त मनोज लोणकर, सह शहर अभियंता बापू गायकवाड, सुनिल भागवानी, मनोज शेटीया, अनिल भालसाकळे, प्रेरणा सिनणकर, वायसीएमचे अधिष्ठता डॉ. राजेंद्र वाबळे, उद्यान अधिकारी महेश गारगोटे, शिवसेना उपनेत्या सुलभा उबाळे, महापालिका गटनेते विश्वजीत बारणे, नगरसेवक निलेश तरस, नगरसेवक निलेश बारणे, नगरसेविका ऐश्वर्या तरस, बापू कातळे उपस्थित होते.

खासदार श्रीरंग बारणे म्हणाले, महापालिकेकडून रावेत बंधाऱ्यातून उचलण्यात येणारे पाणी अतिशय अशुद्ध आहे. देहूरोड, किवळे भागातील नाले नदीला मिळत आहेत. काही सोसायट्यांमधील सांडपाणीही थेटपणे नदीपात्रात सोडले जाते. त्यामुळे अशुद्ध पाणी होत आहे. महापालिका पवना धरणातू ५५० एमएलडी पाणी उचलते. पाणी उचलणे, शुद्धीकरणाची क्षमता नसल्याने जास्त पाणी उचलणे वाढविण्यात येत नाही. रावेत येथील पाणी अशुद्ध झाल्याने शिवणे बंधाऱ्यातून पाणी उचलण्याबाबत चाचपणी करावी. महापालिकेने तिथे गेट उभारले आहे. त्यामुळे भविष्यात तेथून पाणी उचलावे. अन्यथा सांडपाणी मिश्रित पाणी नागरिकांना मिळेल. आंद्रा धरणातील शंभर एमएलडी पाणी निघोजे बंधाऱ्यातून उचलण्यात येते. हे पाणी रावेतपेक्षा अशुद्ध असल्याचे प्रशासनाने सांगितले. त्यामुळे शहराला अशुद्ध पाणीपुरवठा होत आहे. त्यासाठी उपाययोजना कराव्यात. टँकर बंद झाले पाहिजेत. पुरेशा दाबाने आणि स्वच्छ पाणीपुरवठा करावा. सांडपाणी वाहिन्यांची वेळेवर साफसफाई केली जाते. त्यामुळे पाणी साचते. पावसाळ्यापूर्वी सांडपाणी, पावसाळी पाणी वाहिन्या स्वच्छ कराव्यात. अनेक ठिकाणी चेंबर्स घुशीने पोखरले आहेत. १८५ किलोमीटर अंतर ड्रेनेजलाईनमधून पिण्याची पाण्याची पाईपलाईन गेली आहे. त्यामुळे थेट अशुद्ध पाणी नागरिकांना दिले जात आहे. त्यामुळे या पाणी पाईपलाईन बदलणे आवश्यक आहे.

बांधकाम विभागातील टेबल कमी करा... 

बांधकाम विभागात प्रत्येक टेबलवर दोन टक्के घेतल्याशिवाय फाईल पुढे जात नाही. त्यामुळे टेबल कमी करावेत. बांधकाम परवानगीसाठी एक खिडकी योजना सुरु करावी. त्यामुळे भ्रष्टाचार होणार नाही. बांधकाम विकसक, नागरिकाला तत्काळ परवानगी मिळाली पाहिजे. जो भाग नव्याने विकसित झाला आहे. त्या भागात पाणी, वीज, स्वच्छता या सुविधा देण्याची सूचनाही खासदार बारणे यांनी केली.

बांधकाम विकसकांकडून उद्याने विकसित करुन घ्या...

उन्हाळ सुटीत महापालिका शाळांवरील पाणी टाक्या स्वच्छ कराव्यात. स्वच्छतागृहे, परिसर स्वच्छ करावा. मैदानावर ब्लॉक बसविल्याने मुलांचा मातीशी संपर्क कमी केला आहे. मातीशी संपर्क राहू द्यावा. शाळांमध्ये पाणी फिल्टर, जीम करायची असल्यास त्याची यादी द्यावी. सीएसआर फंडातून निधी उपलब्ध करुन दिली जाईल. शहरातील उद्यानाची दुरवस्था झाली आहे. एकही गार्डन व्यवस्थिती नाही, लॉन नाही. ठेकेदार राजकीय लोकांशी संबंधित असतात. बांधकाम विकसक चौक विकसित करतात. त्याचप्रमाणे उद्याने विकसित करुन घ्यावीत. देखभाल दुरुस्तीची जबाबदारी त्यांच्यावरच ठेवावी. त्यासाठी विकसकांची तयारी आहे. उद्यानाला महापालिकेचे नाव ठेवावे. त्यासाठी बांधकाम विकसकांची बैठक घ्यावी. त्यांची कामे तत्काळ केली, तर तेही महापालिकेला मदत करतील, असेही ते म्हणाले.

प्रभागातील अधिकाऱ्यांच्या बदल्या करा... 

प्रभाग स्वतरावरील अधिकाऱ्यांकडून सर्वसामान्य नागरिकांच्या कामांची दखल घेतली जात नाही. त्यासाठी वर्षानुवर्षे प्रभागात काम करणाऱ्या अधिकाऱ्यांची बदली करावी. लोकप्रतिनिधींबरोबर सर्वसामान्य नागरिकांच्या ऐकले पाहिजे. महापालिका रुग्णालयांमध्ये ३५ टक्के शहराबाहेरील रुग्ण उपचार घेतात. कोणावर उपचार करण्यास विरोध नाही. पण, शहरातील करदात्यालाही दर्जेदार उपचार मिळाले पाहिजेत. खासगी रुग्णालयांना धर्मादाय आयुक्तांच्या आदेशानुसार दहा टक्के बेड राखीव ठेवावे लागतात. महापालिका हद्दीत २० रुग्णालये आहेत. हे रुग्णालये शासकीय योजनांचा रुग्णांना फायदा देत नाहीत. त्याचे ऑडीट करण्याची महापालिकेची जबाबदारी आहे. महात्मा फुले जनआरोग्य योजनेअंतर्गत किती रुग्णांना लाभ दिला, किती जणांना मोफत उपचार दिले, याची माहिती घ्यावी. गरीब रुग्णांना उपचार दिले जातात का, याची तपासणी करावी. काही रुग्णालये वसुली केंद्र झाली आहेत. रुग्णांची लूट करतात. त्याची तपासणी करावी, असेही ते म्हणाले.

मोकाट श्वानांचा बंदोबस्त करावा... 

शहरात मोकाट श्वानांचा उपद्रव वाढला आहे. या क्षेत्रात काम करणाऱ्यांबरोबर घेऊन श्वानांसाठी संगोपण केंद्र करता येईल का याचा अभ्यास करावा. त्यासाठी उपाययोजना कराव्यात. मोकाट, पाळीव श्वानांना जीपीएस सिस्टीम बसवावी. कोणता श्वान कुठे जातो, कोणाला चावा घेतला आहे त्याची माहिती मिळेल. रेबीज इंजेक्शन द्यावेत, अशी सूचनाही त्यांनी केली.

पिंपरी : शहराचा विकास केवळ रस्ते, इमारती आणि पायाभूत सुविधांपुरता मर्यादित नसून, नागरिकांच्या आरोग्यदायी, सक्रिय आणि आनंदी जीवनशैलीसाठी आवश्यक सार्वजनिक सुविधा उभारणे तितकेच महत्त्वाचे आहे. मोशी-बोऱ्हाडेवाडी येथील हा अ‍ॅमेनिटी स्पेस प्रकल्प स्थानिक युवक, महिला, ज्येष्ठ नागरिक आणि लहान मुलांसाठी उपयुक्त ठरणार असून, परिसराच्या सर्वांगीण विकासाला नवी दिशा देणारा ठरेल, असे प्रतिपादन महापौर रवि लांडगे यांनी केले.

पिंपरी चिंचवड महानगरपालिकेच्या वतीने मोशी, बोऱ्हाडेवाडी येथील गट क्र. २३० व २३१ मध्ये विकसित करण्यात येणाऱ्या अ‍ॅमेनिटी स्पेस प्रकल्पाचे भूमिपूजन महापौर रवि लांडगे यांच्या हस्ते संपन्न झाले, त्यावेळी ते बोलत होते.

या कार्यक्रमास पिंपरी चिंचवड महापालिका विधी समिती सभापती सुजाता बोराटे,माजी महापौर तथा नगरसदस्य राहुल जाधव, निखिल बोऱ्हाडे, नगरसदस्या सारिका बोऱ्हाडे आणि महापालिकेचे कार्यकारी अभियंता विजय जाधव, बाळासाहेब लांडे, जनता संपर्क अधिकारी प्रफुल्ल पुराणिक तसेच निलेश बोराटे,आतिश बारणे, शिवाजी बारणे यांच्यासह विविध सामाजिक कार्यकर्ते आणि स्थानिक नागरिक मोठ्या संख्येने उपस्थित होते.

 महापौर रवि लांडगे म्हणाले, मोशी-बोऱ्हाडेवाडी परिसर झपाट्याने विकसित होत असताना येथील नागरिक,युवक-युवती, महिला तसेच लहान मुलांसाठी सुसज्ज सार्वजनिक जागेची आवश्यकता लक्षात घेऊन महापालिकेने हा प्रकल्प हाती घेतला आहे. या प्रकल्पामुळे परिसरातील नागरिकांना केवळ मनोरंजन व विरंगुळ्याचीच नव्हे, तर आरोग्यदायी जीवनशैलीकडे वाटचाल करण्यासाठीही मोठा आधार मिळणार आहे.असेही त्यांनी सांगितले.
या अ‍ॅमेनिटी स्पेस प्रकल्पासाठी २ कोटी ७२ लाख रुपयांचा खर्च अपेक्षित असून या प्रकल्पासाठी सल्लागार म्हणून एस.एस. आर्किटेक्टस यांची नियुक्ती करण्यात आली आहे. या प्रकल्पाचे काम पूर्ण करण्यासाठी ९ महिन्याची मुदत देण्यात आली आहे.

....अशा आहेत सोईसुविधा

या अ‍ॅमेनिटी स्पेस प्रकल्पामध्ये नागरिकांसाठी व्हॉलीबॉल कोर्ट (४८० चौ.मी.), योगा कोर्ट (१६० चौ.मी., बॅडमिंटन कोर्ट (३५० चौ.मी.), सॅन्ड पिट (जंगल जिम) (१०० चौ.मी., बहुउद्देशीय मैदान (१५५० चौ.मी.), अम्पिथिएटर, पादचारी मार्ग , बैठक व्यवस्था, स्वच्छतागृह आणि पार्किंग यांसारख्या विविध आधुनिक व उपयुक्त सुविधा विकसित करण्यात येणार आहेत त्यामुळे हा प्रकल्प सर्व वयोगटातील नागरिकांसाठी आकर्षणाचे व उपयुक्ततेचे केंद्र ठरणार आहे. स्थानिक तरुणांना खेळ आणि शारीरिक तंदुरुस्तीच्या दृष्टीने आवश्यक सुविधा एकाच ठिकाणी उपलब्ध होणार असल्याने त्यांना क्रीडा क्षेत्रात प्रोत्साहन मिळणार आहे. तसेच महिलांसाठी व ज्येष्ठ नागरिकांसाठी सुरक्षित, स्वच्छ आणि सुसज्ज सार्वजनिक परिसर उपल

ब्ध होणार असल्याने सामाजिक संवाद, आरोग्यवर्धन आणि सकारात्मक वातावरण निर्मितीस चालना मिळणार आहे. या प्रकल्पाच्या माध्यमातून परिसराचा केवळ भौतिक विकास होणार नसून, आरोग्य, क्रीडा, सामाजिक एकात्मता आणि जीवनमान उंचावण्याच्या दृष्टीनेही हा उपक्रम अत्यंत महत्त्वाचा ठरणार आहे. नागरिकांच्या दैनंदिन जीवनात सुविधा, आनंद आणि सक्रियता वाढविणारा हा प्रकल्प मोशी-बोऱ्हाडेवाडी परिसरासाठी विकासाचा नवा टप्पा ठरणार आहे, अशी माहिती यावेळी देण्यात आली.

पिंपरी :   चिंचवड विधानसभेचे कार्यसम्राट आमदार शंकर जगताप यांच्या वाढदिवसानिमित्त उन्नती सोशल फाउंडेशनच्या वतीने पर्यावरणपूरक असा अभिनव व समाजाभिमुख उपक्रम राबविण्यात आला. या उपक्रमांतर्गत पिंपळे सौदागर परिसरात नागरिकांना १००० वृक्षांचे मोफत वाटप करण्यात आले.

वाढदिवसाचे औचित्य साधत समाजासाठी काहीतरी सकारात्मक व शाश्वत योगदान देण्याच्या उद्देशाने आयोजित या उपक्रमातून “एक व्यक्ती – एक वृक्ष” ही संकल्पना प्रभावीपणे राबविण्यात आली. वाढत्या PCMC नागरीकरणामुळे कमी होत चाललेले हरित क्षेत्र लक्षात घेता पर्यावरण संवर्धनाची गरज अधोरेखित करण्यात आली. प्रत्येक नागरिकाने किमान एक वृक्ष लावून त्याचे संगोपन करावे, असा संदेश या उपक्रमातून देण्यात आला.

महाराष्ट्राला परतीच्या पावसाने मोठा फटका दिला. मराठवाड्यात अतिवृष्टीने पूरपरिस्थिती निर्माण झाली होती. या पूरपरिस्थितीने शेतजमिनीच पाहून गेल्या आहेत. या नुकसानग्रस्त शेतकऱ्यांना अद्यापही मदत मिळाली नसून शेतकऱ्यांची स्थिती बिकट झाली आहे. आता सरकार शेतकऱ्यांच्या जखमेवर मीठ चोळण्याचे काम करत आहे. अकोला येथील शेतकऱ्यांनी 5,8, 13 रुपये अशी मदत करण्यात आली आहे. यावर काँग्रेस नेते विजय वडेट्टीवार यांनी तीव्र संताप व्यक्त केला आहे.

विजय वडेट्टीवार यांनी एक्सवर पोस्ट करत संताप व्यक्त केला आहे. त्यांनी पोस्टमध्ये म्हटले आहे की, राज्यात शेतकऱ्यांवर अस्मानी संकट आले, शेतकऱ्यांना मदत मिळणे दूरच उलट प्रधानमंत्री पिक विमा योजनेत शेतकऱ्यांची अहवेलना करण्यात आली आहे. अकोला येथील शेतकऱ्यांना ५ रुपये, ८ रुपये, १३ रुपये अशी मदत करण्यात आली आहे. याला जखमेवर तिखट चोळणे म्हणतात. एकीकडे हातातील पीक केलं, जे आहे त्या शेतमालाला भाव मिळत नाही जे नुकसान झालं त्याचा विमा असा पाच रुपये मिळणार असेल तर शेतकरी जगणार कसा? शेतकऱ्यांना मदत सोडा पण त्यांचा असा अपमान करू नका, असे त्यांनी पोस्टमध्ये म्हटले आहे.

देवरुख शहरातील सृजन सायन्स अँड इनोव्हेशन ऍक्टिव्हिटी सेंटरतर्फे कचरा निर्मूलन मोहीम स्पर्धा विद्यार्थ्यांसाठी आयोजित करण्यात आली आहे. यामध्ये विद्यार्थ्यांनी जास्तीत जास्त प्लास्टिकचा कचरा गोळा करणाऱ्या विद्यार्थ्यांना बक्षीस दिले जाणार आहेत. या स्पर्धेत अधिकाधिक विद्यार्थ्यांनी सहभागी व्हावे असे आवाहन सृजन सायन्स सेंटर देवरुख तर्फे करण्यात आले आहे.

प्लास्टिकमुक्त शहर स्वच्छतेचा ध्यास या युक्तीप्रमाणे ही स्पर्धा होणार आहे. प्लास्टिकमुळे वाढणारे प्रदूषण कमी करणे आणि विद्यार्थ्यांमध्ये स्वच्छता, पुनर्वापर व पर्यावरण संरक्षणाची जाणीव निर्माण करणे यासाठी या स्पर्धेचे आयोजन करण्यात आले आहे. सर्व स्पर्धकांनी त्यांच्या परिसरातील रिकाम्या प्लास्टिक बाटल्या, प्लास्टिक कचरा व रॅपर्स गोळा करायचे आहेत. हे सर्व प्लास्टिक प्रत्येक रिकाम्या बाटलीत भरायचे आहे. या भरलेल्या बाटल्या सृजन सायन्स सेंटरमध्ये जमा करायच्या आहेत.

ज्या विद्यार्थ्यांनी सर्वाधिक प्लास्टिक संकलन केले असेल त्या पहिल्या २५ विद्यार्थ्यांना आकर्षक बक्षिसे दिली जाणार आहेत. त्याचप्रमाणे प्रत्येक सहभागी स्पर्धकालाही बक्षिसे देण्यात येतील. जमवलेल्या प्लास्टिकपासून उपयुक्त वस्तू बनविण्यात येणार आहेत. हा उपक्रम सायन्स सेंटरमध्येच राबवला जाणार आहे. यासाठी सर्व प्लास्टिक १ नोव्हेंबर रोजी स्थळ सृजन सायन्स सेंटर देवरुख येथे सकाळी १० ते सायंकाळी ५ या वेळेतच जमा करावयाचे आहे. या अनोख्या स्पर्धेत जास्तीत जास्त विद्यार्थ्यांनी सहभागी व्हावे, असे आवाहन सेंटरच्या वतीने करण्यात आले आहे.

सप्टेंबर महिन्यात पावसाने दाखविलेली अवकृपा आता ऑक्टोबरच्या शेवटच्या आठवड्यातही कायम ठेवली आहे. सततच्या पावसाने परिसरातील शेतकरी हवालदिल झाले आहेत. पावसाळा हंगाम संपला तरी सतत पाच दिवस पाऊस पडत असल्याने काहींनी कापून ठेवलेले भातशेती वाया जाण्याची भीती व्यक्त केली जात आहे.

अवकाळी पावसामुळे शेतीचे मोठे नुकसान झाले आहे. पाऊस पाठ सोडायला तयार नसल्यामुळे हातातोंडाशी आलेले पीक पूर्णपणे मातीमोल झाले आहे. यात पावटा,कुळीथ,तुर या प्रमुख पिकांचे सर्वाधिक नुकसान झाले आहे. शेतांमध्ये पाणी साचल्याने उभी पिके कुजून गेली आहेत. काढणी करून ठेवलेली शेती पाण्याखाली गेल्यामुळे शेतकऱ्यांच्या पदरात काहीच पडणार नाही, अशी भीती व्यक्त होत आहे.

दरम्यान, ऑक्टोबर संपत आला तरी, पावसाचे संकट थांबण्याचे नाव घेत नसून पाच दिवसांपासून सतत पाऊस पडत असल्याने शेतात पाणी साचले आहे. वायंगणी शेती पाण्यावर तरंगत आहे. भात पिकांची प्रचंड नुकसान झाले असून पिके वाया जाण्याची दाट शक्यता निर्माण झाली आहे. मागील महिन्यात झालेल्या अतिवृष्टीची नुकसान भरपाई अद्याप मिळालेली नाही. ही भरपाई कधी मिळणार याची शाश्वती नाही. त्यामुळे आता तरी पावसा थांब रे बाबा, बस झाले, असे म्हणण्याची वेळ शेतकऱ्यांवर आली आहे.

लहान विद्यार्थ्यांना तसेच अगदी मोठ्या माणसांना देखील अवकाशाबद्दल नेहमीच कुतूहल असते. हे कुतूहल अधिक जागृत व्हावे आणि त्यातून अवकाश विज्ञान सोप्या पद्धतीने कळावे यासाठी देवरुख येथील सृजन विज्ञान केंद्रात चार नवीन मॉडेल्स आणण्यात आली असल्याची माहिती देवरुख शिक्षण प्रसारक मंडळाचे अध्यक्ष सदानंद भागवत यांनी दिली.

सूर्य, पृथ्वी आणि चंद्र प्रतिकृती
या मॉडेल मधून पृथ्वीचे परिवलन व परिभ्रमण, ऋतू, दिवस-रात्र, ग्रहणे, अमावास्या आणि पौर्णिमा, चंद्राची कक्षा, अधिक महिना, राशी संक्रमण, चंद्र महिना अशा मूलभूत संकल्पना विषद होतात.

तिथी मॉडेल
हे मॉडेल आहे तिथी आणि नक्षत्रे या विषयाची प्रतिकृती आहे. हे चंद्र सूर्य व पृथ्वी यांच्या गतीवर आधारित भारतीय पंचांगातील काही संकल्पना स्पष्ट करते जसे शुक्ल पक्ष, कृष्ण पक्ष, सूर्याचे नक्षत्र स्थान, सायन व निरयन.

अभिमुखता मॉडेल
पृथ्वीची परांचन गती समजून घेण्यासाठी हे मॉडेल मदत करते. आताचा ध्रुव तारा काही हजार वर्षांनंतर त्या ठिकाणी रहाणार नाही. तसेच पंचांगातील महिन्यांची नावे देण्याचा नियम पण यामुळेच बदलावा लागेल. ‘विषूव बिंदू’ दर ७२ वर्षांनी एक अंश कसा सरकतो हे या प्रतिकृतीतून बघता येते.

राहू केतू मॉडेल
राहू व केतू या संकल्पनेचे खगोलीय स्पष्टीकरण ही प्रतिकृती करते. राहू व केतू ज्या कक्षेत फिरतात ती पण बदलत असते. एक फेरी पूर्ण व्हायला १८.६ वर्षे कशी लागतात हे कळते तसेच ग्रहणे समजण्यासही ही प्रतिकृती मदत करते.

ही सर्व मॉडेल्स सुप्रसिद्ध अवकाश अभ्यासक रवींद्रजी गोडबोले यांनी थ्री डी प्रिंटिंग तंत्रज्ञानाने बनवलेली आहेत. सृजन विज्ञान केंद्र विद्यार्थ्यांमध्ये विज्ञानाचा प्रसार व्हावा यासाठी कटीबद्ध आहे. या मॉडेल्सच्या माध्यमातून विज्ञान केंद्रामध्ये लवकरच अवकाश विषयीची वर्कशॉप्स सुरू करण्यात येणार आहेत त्याचा लाभ कोकणातील विद्यार्थ्यांनी घ्यावा असे आवाहन सदानंद भागवत यांनी केले आहे.

सध्या आर्टिफिशियल इंटेलिजन्स अर्थात एआयमुळे नोकऱ्यांमध्ये उलथापालथ झाली आहे. यामुळे अनेक कंपन्यांमध्ये नोकरदार कपात होऊ लागली आहे. तसेच एआयचा वापर लोकांच्या प्रश्नांची उत्तरे देण्यापुरते मर्यादित राहिलेले नाही तर, आता वैद्यकीय आणि नातेसंबंधांच्या सल्ल्यासाठी एआय वापरले जात आहे. अलिकडच्या संशोधनातून असे दिसून आले आहे की, एआयचे वैयक्तिक स्वरूप किशोरवयीन मुलांना आकर्षित करत असून तरुणाईमध्ये एआयची जादू दिवसेंदिवस वाढत चालली आहे.

अमेरिकेत एका शाळेतील मुलांचा सर्व्हे करण्यात आला. त्यात एक तृतियांश मुलं एआयला आपला मित्र समजून गप्पा मारतात. हे चिंताजनक आहे. मेल अलाईज यूकेने थेरपी किंवा थेरपिस्ट म्हणून लेबल असलेल्या चॅटबॉट्सच्या वाढत्या ट्रेंडबद्दल चिंता व्यक्त केली आहे. कॅरेक्टर एआय द्वारे उपलब्ध असलेल्या सर्वात लोकप्रिय चॅटबॉट्सपैकी एक आहे. त्याला एका वर्षात 7 कोटी 80 हजार संदेश मिळाले. ही संस्था एआय गर्लफ्रेंडच्या वाढत्या ट्रेंडबद्दल देखील चिंतित आहे. ज्यामध्ये युजर्स त्यांच्या ऑनलाइन जोडीदाराच्या दिसण्यापासून ते त्यांच्या वर्तनापर्यंत सर्वकाही वैयक्तिकरित्या निवडू शकतात. इंग्लंड, स्कॉटलंड आणि वेल्सच्या 37 शाळांमध्ये केलेल्या सर्व्हेक्षणात 53 टक्के अल्पवयीन मुलांचे म्हणणे आहे की, त्यांना वास्तविक दुनियेपेक्षा ऑनलाईन जग जास्त आवडते.

हे संशोधन अशा वेळी आले आहे जेव्हा लोकप्रिय आर्टिफिशियल इंटेलिजेंस चॅटबॉट स्टार्टअप character.ai ने किशोरांना त्यांच्या AI चॅटबॉट्सशी खुले संभाषण करण्यास पूर्णपणे बंदी घातली आहे. याचा वापर लाखो लोक वैद्यकीय आणि रोमँटिक माहितीसाठी करत होते.

मतदार यादीतील घोटाळा, निवडणूकप्रक्रियेतील गोंधळ या विरोधात मुंबईत सर्वपक्षांकडून 1 नोव्हेंबरला मोर्चा काढण्यात येणार आहे. या मोर्चाच्या तयारीसाठी आणि रणनीती ठरवण्यासाठी सर्वपक्षीय नेत्यांची बैठक झाली. त्यानंतर या सत्याचा मोर्चाबाबत माहिती देण्यात आली. शिवसेना (उद्धव बाळासाहेब ठाकरे) नेते, आमदार अॅड. अनिल परब यांनी या मोर्चाबाबत माहिती दिली.

मतदार यादीतील गोंधळ, निवडणूक प्रक्रियेतील घोटाळा या विरोधात असलेले सर्व पक्ष आणि मतदार या मोर्चात सहभागी होणार आहे. हा मोर्चा दुपारी 1 वाजता फॅशन स्ट्रीट येथून निघणार आहे आणि मेट्रो सिनेमामार्गे मुंबई महापालिकेच्या मुख्यालयाच्या प्रवेशद्वाराजवळ थांबेल. या मोर्चात महाविकास आघाडीतील सर्व प्रमुख नेते, मनसेप्रमुख राज ठाकरे, शिवसेना (उद्धव बाळासाहेब ठाकरे) पक्षप्रमुख उद्धव ठाकरे, डाव्या पक्षांचे सर्व प्रमुख नेते उपस्थित राहणार असून ते मोर्चाला मार्गदर्शन करणार आहे. या मोर्चाला लाखोंच्या संख्येने उपस्थिती असेल, असा विश्वासही अनिल परब यांनी व्यक्त केला.

केवळ राजकीय पक्षाचे नेते, पदाधिकारी, कार्यकर्ते यांच्यासोबतच आपले मत चोरीला गेले आहे आणि चुकीच्या पद्धतीने हे सरकार सत्तेत आले आहे, असे ज्यांना वाटते, ती जनताही या मोर्चात मोठ्या संख्येने सहभागी होणार आहे. या मोर्चाबाबत पोलिसांना माहिती दिली आहे. त्यांच्याकडून आवश्यक त्या सूचना घेतल्या आहेत. मोर्चाचे रुट प्रसिद्धीकरता देण्यात आले आहे. आमच्या आणि मतदारांच्या मागण्यांसाठी हा मोर्चा काढण्यात येत आहे. मतदारयादीतील घोळ दूर करण्यात यावे, ही प्रमुख मागणी आहे.

सर्वसामान्य मुंबईकरांचा विचार करत मोर्चा शनिवारी आयोजित करण्यात आला आहे. तसेच दुपारी 1 ते 4 या वेळेत मोर्चा होणार आहे. त्यामुळे मुंबईकरांना त्रास होणार नाही, याची काळजी घेण्यात आली आहे. हा मोर्चा शांततेत पार पडणार असून या मोर्चात प्रमुख नेते मतचोरी, मतदान यादीतील घोटाळा याबाबत पुढील आंदोलनाची चर्चा करत त्याची माहिती देणार आहेत, असे अनिल परब यांनी स्पष्ट केले.