लखनौचा सात गड्यांनी पराभव, कर्णधार सॅमसन, ज्युरेल यांची नाबाद अर्धशतके

वृत्तसंस्था/ लखनौ

कर्णधार आणि ‘सामनावीर’ संजू सॅमसन आणि ध्रुव ज्युरेल यांच्या नाबाद अर्धशतकांच्या त्याचप्रमाणे अभेद्य शतकी भागीदारीच्या जोरावर राजस्थान रॉयल्स संघाने अग्रस्थानावरील आपली पकड अधिक मजबूत करताना लखनौ सुपरजायंट्सचा 6 चेंडू बाकी ठेवून 7 गड्यांनी दणदणीत पराभव केला. या विजयामुळे राजस्थान रॉयल्सने स्पर्धेच्या गुणतक्त्यात 9 सामन्यातून 16 गुणासह अग्रस्थान भक्कम केले आहे.

कर्णधार केएल राहुल आणि दीपक हुडा यांच्या शानदार अर्धशतकांच्या जोरावर शनिवारी येथे खेळविण्यात आलेल्या आयपीएल क्रिकेट स्पर्धेतील सामन्यात लखनौ सुपर जायंट्सने राजस्थान रॉयल्सला विजयासाठी 197 धावांचे आव्हान दिले. प्रत्युत्तरादाखल खेळताना राजस्थान रॉयल्सने 19 षटकात 3 बाद 199 धावा जमवित हा सामना सात गड्यांनी जिंकला. या स्पर्धेतील शनिवारचा हा 44 वा सामना आहे.

जैस्वाल आणि बटलर या सलामीच्या जोडीने राजस्थानच्या डावाला सावध पण भक्कम सुरुवात करून देताना 35 चेंडूत 60 धावांची भागीदारी केली. यश ठाकुरने बटलरचा त्रिफळा उडविला. त्याने 18 चेंडूत 1 षटकार आणि 4 चौकारांसह 34 धावा जमविल्या. त्यानंतर राजस्थानला स्टोईनिसने आणखी एक धक्का दिला. स्टोईनिसच्या गोलंदाजीवर सलामीचा जैस्वाल बिश्नोईकरवी झेलबाद झाला. त्याने 18 चेंडूत 1 षटकार आणि 3 चौकारासह 24 धावा जमवल्या. अमित मिश्राने रियान परागला बदोनीकरवी झेलबाद केले. त्याने 11 चेंडूत 1 षटकारासह 14 धावा जमवल्या. राजस्थानची यावेळी स्थिती 8.4 षटकात 3 बाद 78 अशी होती.

कर्णधार सॅमसन आणि ध्रुव ज्युरेल यांनी दमदार फलंदाजी करत चौथ्या गड्यासाठी अभेद्य 121 धावांची शतकी भागीदारी नोंदवली. या जोडीने राजस्थानला एक षटक बाकी ठेवून विजय मिळवून दिला. सॅमसनने 33 चेंडूत 4 षटकार आणि 7 चौकारांसह नाबाद 71 तर ज्युरेलने 34 चेंडूत 2 षटकार आणि 5 चौकारासह नाबाद 52 धावा झळकवल्या. राजस्थानला केवळ अवांतर 4 धावा मिळाल्या. राजस्थानने पॉवर प्ले दरम्यानच्या 6 षटकात 60 धावा जमवताना एक गडी गमवला. राजस्थानचे अर्धशतक 30 चेंडूत तर शतक 70 चेंडूत आणि दीडशतक 93 चेंडूत फलकावर लागले. सॅमसनने 28 चेंडूत 2 षटकार आणि 6 चौकारांसह तर ज्युरेलने 31 चेंडूत 2 षटकार आणि 5 चौकारांसह अर्धशतक झळकवले. या जोडीने शतकी भागीदारी 53 चेंडूत नोंदवली. राजस्थानच्या डावात 8 षटकार आणि 20 चौकार नोंदवले गेले. लखनौतर्फे यश ठाकुर, स्टोईनिस आणि अमित मिश्रा यांनी प्रत्येकी एक गडी बाद केला. या सामन्यामध्ये राजस्थान संघातर्फे चहलच्या जागी रियान परागला तर लखनौतर्फे डिकॉकच्या जागी अमित मिश्राला इम्पॅक्ट खेळाडू म्हणून मैदानात उतरविले.

या सामन्यात राजस्थानने नाणेफेक जिंकून लखनौला प्रथम फलंदाजी दिली. त्यांच्या डावाला चांगली सुरुवात झाली नाही. सलामीचा डिकॉक बोल्टच्या पहिल्याच षटकातील तिसऱ्याच चेंडूवर त्रिफळाचित झाला. त्याने 3 चेंडूत 2 चौकारासह 8 धावा जमविल्या. त्यानंतर संदीप शर्माने स्टोईनिसला खाते उघडण्यापूर्वीच त्रिफळाचित केले. यानंतर कर्णधार केएल राहुल आणि दीपक हुडा यांनी संघाची बाजू सावरताना तिसऱ्या गड्यासाठी 10.1 षटकात 115 धावांची शतकी भागीदारी केली. लखनौची ही जोडी राजस्थानच्या अश्विनने फोडली. अश्विनच्या गोलंदाजीवर हुडा पॉवेलकरवी झेलबाद झाला. त्याने 31 चेंडूत 7 चौकारासह 50 धावा जमवल्या. संदीप शर्माने लखनौला आणखी एक धक्का देताना पुरनला बोल्टकरवी झेलबाद केले. त्याने 1 चौकारासह 11 धावा जमवल्या. डावातील 18 व्या षटकात कर्णधार राहुल आवेश खानच्या गोलंदाजीवर उत्तुंग फटका मारण्याच्या नादात बोल्टकडून झेल देऊन तंबूत परतला. त्याने 48 चेंडूत 2 षटकार आणि 8 चौकारांसह 76 धावा झळकवल्या. बडोनी 13 चेंडूत 1 चौकारासह 18 धावावर तर कृणाल पांड्या 11 चेंडूत 1 चौकारासह 15 धावावर नाबाद राहिले. लखनौला 18 अवांतर धावा मिळाल्या.

लखनौच्या डावामध्ये 2 षटकार आणि 20 चौकार नोंदवले गेले. लखनौने पॉवर प्ले दरम्यानच्या 6 षटकात 46 धावा जमवताना 2 गडी गमवले. राहुल आणि हुडा यांनी अर्धशतकी भागीदारी 34 चेंडूत तर शतकी भागीदारी 54 चेंडूत नोंदवली. राहुलने 31 चेंडूत 2 षटकार आणि 6 चौकारासह अर्धशतक झळकवले तर हुडाने 30 चेंडूत 7 चौकारासह अर्धशतक पूर्ण केले. लखनौचे दीडशतक 91 चेंडूत फलकावर लागले. राजस्थानतर्फे संदीप शर्माने 31 धावात 2 तर आवेश खान, रविचंद्रन अश्विन आणि बोल्ट यांनी प्रत्येकी एक गडी बाद केला.

संक्षिप्त धावफलक : लखनौ 20 षटकात 5 बाद 196 (राहुल 76, हुडा 50, पुरन 11, बदोनी नाबाद 18, कृणाल पांड्या नाबाद 15, डिकॉक 8, अवांतर 18, संदीप शर्मा 2-31, बोल्ट, आवेश खान, आर. अश्विन प्रत्येकी एक बळी).

राजस्थान रॉयल्स 19 षटकात 3 बाद 199 (यशस्वी जैस्वाल 24, जोस बटलर 34, रियान पराग 14, संजू सॅमसन नाबाद 71, ध्रुव ज्युरेल नाबाद 52, अवांतर 4, यश ठाकुर, स्टोईनिस आणि अमित मिश्रा प्रत्येकी एक बळी.)

रोमांचक सामन्यात मुंबई 10 धावांनी पराभूत : सामनावीर मॅकगर्कची 27 चेंडूत 84 धावांची तुफानी खेळी

वृत्तसंस्था/ नवी दिल्ली

अरुण जेटली स्टेडियमवर झालेल्या रोमांचक सामन्यात दिल्ली कॅपिटल्सने मुंबई इंडियन्सवर 10 धावांनी विजय मिळवला. प्रारंभी, मॅकगर्क, स्टब्ज व शाय होपच्या दमदार खेळीच्या जोरावर दिल्लीने 20 षटकांत 4 बाद 257 धावा केल्या. प्रत्युत्तरात मुंबईचा संघ तिलक वर्माच्या अर्धशतकाच्या जोरावर 247 धावाच करु शकला. दरम्यान, दिल्लीचा हा दहा सामन्यातील पाचवा विजय असून या विजयासह त्यांनी प्ले ऑफमध्ये पोहोचण्याच्या आशा कायम ठेवल्या आहेत. दुसरीकडे पराभवामुळे मुंबईची वाटचाल मात्र बिकट झाली आहे. 27 चेंडूत 84 धावांची खेळी साकारणाऱ्या मॅकगर्कला सामनावीर पुरस्कार देण्यात आला.

दिल्लीने विजयासाठी दिलेल्या 258 धावांच्या आव्हानाचा पाठलाग करताना मुंबईची सुरुवात खराब झाली. पॉवरप्लेमध्ये मुंबईला 6 षटकात 65 धावा करता आल्या, पण तीन फलंदाजाना गमावलं होते. रोहित शर्माला 8 धावा काढता आल्या. ईशान किशनने 14 चेंडूत 20 धावांची खेळी केली तर सूर्यकुमार यादवने 13 चेंडूमध्ये 26 धावा जोडल्या. सलामीचे तीन फलंदाज बाद झाल्यानंतर तिलक वर्माने हार्दिकला सोबत घेत चौथ्या गड्यासाठी 71 धावांची भागीदारी केली. हार्दिकने 24 चेंडूत 4 चौकार व 3 षटकारासह 46 धावा केल्या, पण चुकीचा फटका मारण्याच्या प्रयत्नात तो बाद झाला. यानंतर मधल्या फळीतील नेहाल वढेरालाही मोठी खेळी करता आली नाही.

तिलक वर्माची एकाकी झुंज

दुसरीकडे तिलक वर्माने मात्र एकाकी झुंज देताना सर्वाधिक 32 चेंडूत 4 चौकार व 4 षटकारासह 63 धावा केल्या. तिलक वर्माने महत्वाच्या दोन भागीदारी करत मुंबईची धावसंख्या वाढवली. तिलक वर्मा आणि हार्दिक पांड्या 71 धावांची भागिदारी केली. तर टीम डेविड आणि तिलक वर्मा यांनी 29 चेंडूत 70 धावा जोडल्या. डेविड 37 धावा काढून आऊट झाला तर तिलक वर्मा हाणामारीच्या प्रयत्नात रनआऊट झाला. तिलक बाद झाल्यानंतर मुंबईला 20 षटकांत 9 बाद 247 धावापर्यंत मजल मारता आली. मोहम्मद नबीने 4 चेंडूमध्ये सात धावांची खेळी केली. पियुष चावलाने 10 धावा केल्या तर ल्युक वूड 9 धावांवर नाबाद राहिला.

मॅकगर्कचा धडाका, स्टब्ज, होपचीही फटकेबाजी

तत्पूर्वी नाणेफेक गमावून प्रथम फलंदाजी करण्यासाठी आलेल्या दिल्लीची सुरुवात दमदार झाली. जेक मॅकगर्कने अवघ्या 15 चेंडूमध्ये अर्धशतक ठोकले. मॅकगर्कच्या वादळी फलंदाजीच्या जोरावर दिल्लीने पॉवरप्लेमध्ये तब्बल 92 धावांचा पाऊस पाडला. मॅकगर्क आणि अभिषेक पोरेल यांनी 7.3 षटकांत 114 धावांची भागीदारी केली. पियुष चावलाने मॅकगर्क याला बाद करत मुंबईला दिलासा दिला. मॅकगर्कने अवघ्या 27 चेंडूमध्ये 84 धावांची झंझावती खेळी केली. या खेळीमध्ये त्याने 6 षटकार आणि 11 चौकारांचा पाऊस पाडला. याशिवाय, अभिषेक पोरेलने 27 चेंडूत 36 धावांचे योगदान दिले. ही जोडी बाद झाल्यानंतर शाय होपने 17 चेंडूत 5 षटकारासह 41 धावा ठोकल्या. होपला वूडने तंबूचा रस्ता दाखवला. होप बाद झाल्यानंतर ट्रिस्टन स्टब्जने शेवटच्या काही षटकात आक्रमक फलंदाजी केली. त्याने 25 चेंडूत नाबाद 48 धावा केल्या. त्याला ऋषभ पंतने 29 धावा करत चांगली साथ दिली. अक्षर पटेल 11 धावांवर नाबाद राहिला. यामुळे दिल्लीने 20 षटकांत 4 बाद 257 धावांचा डोंगर उभा केला.

संक्षिप्त धावफलक

दिल्ली कॅपिटल्स 20 षटकांत 4 बाद 257 (मॅकगर्क 27 चेंडूत 84, अभिषेक पोरेल 36, शाय होप 17 चेंडूत 41, ऋषभ पंत 29, ट्रिस्टन स्टब्ज 25 चेंडूत नाबाद 48, अक्षर पटेल नाबाद 11, बुमराहृ चावला, मोहम्मद नबी व ल्युक वूड प्रत्येकी एक बळी).

मुंबई इंडियन्स 20 षटकांत 9 बाद 247 (इशान किशन 20, रोहित शर्मा 8, सुर्यकुमार यादव 26, तिलक वर्मा 32 चेंडूत 63, हार्दिक पंड्या 46, टीम डेविड 37, पियुष चावला 10, मुकेश कुमार व रसिख सलाम प्रत्येकी 3 बळी, खलील अहमद 2 बळी).

 युवा फलंदाज मॅकगर्कचा विक्रम

शनिवारी मुंबईविरुद्ध सामन्यात दिल्लीचा युवा सलामीवीर मॅकगर्कने अवघ्या 15 चेंडूत अर्धशतक झळकावले. त्याचे हे यंदाच्या हंगामातील तिसरे अर्धशतक असून त्याने दुसऱ्यांदा 15 चेंडूत अर्धशतक केले आहे. दिल्लीसाठी सर्वात वेगवान अर्धशतक करण्याच्या आपल्याच विक्रमाशी फ्रेझर मॅकगर्कने बरोबरी केली आहे. यापूर्वी त्याने हैदराबादविरुद्धच्या सामन्यातही 15 चेंडूत अर्धशतक केले होते. यापूर्वी, दिल्लीसाठी आयपीएलमध्ये सर्वात वेगवान अर्धशतक करण्याचा विक्रम ख्रिस मॉरिसच्या नावावर होता. त्याने 17 चेंडूत गुजरातविरुद्ध 2016 मध्ये अर्धशतक केलं होते. दरम्यान, हा विक्रम मॅकगर्कने दोनदा मोडला आहे.

वृत्तसंस्था/ अहमदाबाद

संपूर्ण बदलाची आवश्यकता असलेला गुजरात जायंट्स आज रविवारी येथे होणाऱ्या इंडियन प्रीमियर लीगच्या सामन्यात रॉयल चॅलेंजर्स बेंगळूरशी भिडणार असून आरसीबीची मधली फळी नुकतीच फॉर्मात आलेली असल्याने त्यापासून त्यांना सावध राहावे लागेल. गुजरात आता नऊ सामन्यांतून आठ गुणांसह गुणतालिकेत सातव्या स्थानावर आहे आणि आठ गुण झालेल्या चेन्नई सुपर किंग्ज आणि दिल्ली कॅपिटल्सना मागे टाकण्याच्या दृष्टीने त्यांना विजय आवश्यक आहे.

गुजरातच्या वेगवान गोलंदाजांची प्रभावी कामगिरी करण्याची गरज आहे. या संपूर्ण आयपीएलमध्ये त्यांची वेगवान गोलंदाजी हवी तितकी धारदार राहिलेली नाही. मोहित शर्मा (10 बळी), उमेश यादव (7 बळी), संदीप वॉरियर (5 बळी) यांनी भरपूर धावा दिल्या आहेत, तर स्पेन्सर जॉन्सन आणि अजमतुल्ला ओमरझाई यांनी देखील फारसा आत्मविश्वास वाढवलेला नाही. त्यांचे फिरकी गोलंदाज रशिद खान (8 बळी), आर. साई किशोर आणि नूर अहमद (प्रत्येकी 6 बळी) यांनी नेत्रदीपक कामगिरी केलेली नसली, तरी त्यांची कामगिरी स्थिर राहिलेली आहे.

रजत पाटीदार आणि कॅमेरून ग्रीन यांचा समावेश असलेल्या मधल्या फळीला सूर सापडल्याने आरसीबीला आशेचा नवा किरण सापडला असून हे लक्षात घेता गुजरातच्या फिरकी त्रिकुटासमोरील आव्हान आणखी कठीण होईल. मात्र येथे दवाचा फारसा त्रास होणार नसून ही बाब त्यांना दिलासादायक ठरेल. पाटीदारने केकेआरविरुद्ध 23 चेंडूंत काढलेल्या 52 धावांनी आरसीबीला विजयाच्या जवळ आणले होते, तर हैदराबादविरुद्ध त्याच्या 20 चेंडूंतील 50 धावांनी विजय मिळवून दिला. तो गुजरातच्या फिरकीपटूंविऊद्ध असाच प्रभाव पाडण्यास उत्सुक असेल.

सनरायझर्सविऊद्ध 20 चेंडूंमध्ये 37 धावा करताना ग्रीननेही प्रभावी कामगिरी केली. यामुळे आरसीबीचे दिनेश कार्तिक आणि महिपाल लोमरर यांच्यावरील अवलंबन कमी होण्यास मदत झाली अहे. तसेच सलामीवीर विराट कोहली आणि फाफ डू प्लेसिस यांना जवळपास प्रत्येक सामन्यात मोठी खेळी करण्याच्या दबावातून मुक्त केले आहे.

दुसरीकडे, गुजरातच्या साई सुदर्शन आणि कर्णधार शुभमन गिल यांनी या आयपीएलमध्ये 300 च्या वर धावा केल्या आहेत, परंतु त्यांची मधली फळी दमदार कामगिरी करू शकलेली नाही. डेव्हिड मिलर (138 धावा), शाहऊख खान (30), विजय शंकर (73) आणि राहुल तेवतिया (153) या खेळाडूंना सातत्य दाखविता आलेले नाही. आरसीबीच्या गोलंदाजांविऊद्ध त्यांच्याकडून मोठया योगदानाची अपेक्षा संघाला असेल. आरसीबीचे वेगवान गोलंदाज मोहम्मद सिराज (4-0-20-0) आणि यश दयाल (3-0-18-1) यांनी सनरायझर्सविरुद्ध चांगली गोलंदाजी केली. त्यांचा लेगस्पिनर कर्ण शर्मा आणि मध्यमगती गोलंदाज ग्रीन यांनीही प्रमुख गोलंदाजांना साथ देताना प्रत्येकी 4 बळी घेतले आहेत. मात्र आरसीबीची गोलंदाजी हा कमकुवत दुवा राहिलेला आहे.

सामन्याची वेळ : दुपारी 3.30 वा.

वृत्तसंस्था/ चेन्नई

गतविजेत्या चेन्नई सुपर किंग्जला लागोपाठ दोन पराभव स्वीकारावे लागल्यानंतर आज रविवारी येथे होणाऱ्या आयपीएल सामन्यात सनरायझर्स हैदराबादचा सामना करताना ते विजयी मार्गावर परतण्यास उत्सुक राहतील. नवीन कर्णधार ऋतुराज गायकवाडच्या नेतृत्वाखाली सीएसकेने मोसमाची चांगली सुऊवात केली होती, परंतु गेल्या दोन सामन्यांत त्यांना लखनौ सुपर जायंट्सने पराभूत केले आहे.

आठ सामन्यांतून चार विजय आणि चार पराभवांसह सीएसके सध्या पाचव्या स्थानावर आहे, दिल्ली कॅपिटल्स आणि गुजरात टायटन्सप्रमाणे त्यांचे 8 गुण झाले आहेत आणि प्लेऑफची शर्यत गरम होत असताना ते विजयपथावर येण्यास उत्सुक असतील. दुसरीकडे, तिसऱ्या क्रमांकावर असलेल्या सनरायझर्स हैदराबादने या हंगामात दोनदा आयपीएलच्या सर्वोच्च धावसंख्येचा विक्रम मोडला आहे. परंतु फलंदाजीतील अतिआक्रमक धोरणाचा त्यांना मागील सामन्यात फटका बसलेला आहे.

सीएसकेची फलंदाजी कर्णधार गायकवाड आणि फॉर्मात असलेला शिवम दुबे यांच्याभोवती फिरते. गायकवाडने आपल्या दुसऱ्या आयपीएल शतकाची नोंद नुकतीच केलेली आहे. रवींद्र जडेजानेही चांगली फलंदाजी केली आहे. पण वरच्या फळीतील रचिन रवींद्र आणि डॅरी मिशेल यांचा हरवलेला फॉर्म ही चिंतेची बाब आहे आणि त्यामुळे त्यांना फलंदाजीची क्रमवारी बदलणे भाग पडले आहे. गोलंदाजीचा विचार करता यजमानांना मागील वेळी एलएसजीविऊद्ध कठोर परिश्रम करावे लागले होते. चेपॉक येथे अनपेक्षितपणे मोठ्या प्रमाणात दव पडल्यामुळे त्यांचे फिरकीपटूंना निप्रभ ठरले आणि पाहुण्यांनी 213 धावांच्या लक्ष्याचा पाठलाग करताना त्याचा पुरेपूर फायदा घेतला.

दुसरीकडे, हवेत उडणारे हैदराबादचे विमान मागील सामन्यात आरसीबीने मैदानात आणलेले आहे. त्यांना गुऊवारी घरच्या मैदानावर 35 धावांनी पराभव स्वीकारावा लागला. हा त्यांचा आयपीएलमधील केवळ तिसरा पराभव आहे. तथापि, त्यामुळे ते विचलित होणार नाहीत. ‘आरसीबी’विरुद्ध लक्ष्याचा पाठलाग करताना हैदराबादची वरची आणि मधली फळी अपयशी ठरली. त्यामुळे दुसऱ्या डावात अतिआक्रमक धोरणे पत्करण्यावर संघ फेरविचार करू शकतो.

हैदराबादच्या फलंदाजीतील क्रमवारीत बदल होण्याची शक्यता नाही, परंतु एडन मार्करमला प्रभावी कामगिरी करून दाखवावी लागेल. गोलंदाजीत वरिष्ठ वेगवान गोलंदाज भुवनेश्वर कुमार मागील तीन सामन्यांमध्ये फक्त एक बळी मिळवू शकला आहे. उमरान मलिक, फझलहक फाऊकी आणि आकाश सिंग हे संधीची वाट पाहत असल्याने त्यांच्यापैकी एखाद्याला खेळविण्याचा विचार केला जाऊ शकतो.

सामन्याची वेळ : सायंकाळी 7.30 वा.

पुरुष-महिलांच्या सांघिक कंपाऊंड प्रकारात भारताचे वर्चस्व

वृत्तसंस्था/ शांघाय

येथे सुरु असलेल्या आंतरराष्ट्रीय तिरंदाजी फेडरेशनच्या विश्वचषक स्टेज वन तिरंदाजी स्पर्धेत पुरूष आणि महिलांच्या सांघिक कंपाऊंड प्रकारात भारताने आपले निर्विवाद वर्चस्व राखताना 3 सुवर्णपदकांची कमाई केली. भारताची महिला तिरंदाजपटू आणि आशियाई स्पर्धेतील चॅम्पियन ज्योती सुरेखा व्हेनामने सुवर्णपदकाची हॅट्ट्रीक साधली. ज्योती व्हेनामने महिलांच्या वैयक्तिक कंपाऊंड तिरंदाजी प्रकारात सुवर्णपदक मिळविताना मेक्सिकोच्या अँड्रीया बिकेराचा पराभव केला. या यशामुळे 27 वर्षीय ज्योतीने महिलांच्या वैयक्तिक, सांघिक आणि मिश्र सांघिक प्रकारात 3 सुवर्णपदके मिळवून हॅट्ट्रीक मारली.

शनिवारी या स्पर्धेतील पुरूषांच्या सांघिक कंपाऊंड तिरंदाजी प्रकारातील अंतिम फेरीत भारताने नेदरलँड्सचा 238-231 अशा गुणांनी पराभव करत सुवर्णपदक मिळविले. या क्रीडा प्रकारात अभिषेक वर्मा, प्रियांश आणि प्रथमेश फुगे यांनी भारताचे प्रतिनिधीत्व केले होते. या अंतिम लढतीत भारतीय तिरंदाजपटूंनी नेदरलँड्सचा केवळ 2 गुणांच्या फरकाने पराभव केला. माईक स्कोलेसर, सिल पेटर आणि स्टेफ विल्यम्सचा यांचा नेदरलँड संघात समावेश होता. मात्र ऑलिम्पिक स्पर्धेत तिरंदाजी या क्रीडा प्रकारात कंपाऊंड तिरंदाजीचा समावेश नाही.

महिलांच्या सांघिक कंपाऊंड तिरंदाजी प्रकारात इटलीचा 236-225 अशा गुणांनी पराभव करत सुवर्णपदक मिळविले. या स्पर्धेत भारतीय महिला तिरंदाजी संघामध्ये ज्योती सुरेखा व्हेनाम, आदिती स्वामी आणि परनीत कौर यांचा समावेश होता. या अंतिम लढतीत पहिल्या तीन फेऱ्यांमध्ये भारताच्या ज्योती, आदिती आणि परनीत यांनी दोन वेळेला 10 पैकी 10 गुण मिळविले. पहिल्या तीन फेऱ्यांअखेर भारताने इटलीवर 178-171 अशी आघाडी मिळविली होती. त्यानंतर चौथ्या फेरीअखेर भारताने केवळ 2 गुण गमवित हा सुवर्णपदकासाठीचा अंतिम सामना 11 गुणांच्या फरकाने जिंकला.

आता तिरंदाजीच्या रिकर्व्ह प्रकारात भारतीय पुरूष संघाचा सुवर्णपदकासाठीचा सामना ऑलिम्पिक विजेत्या दक्षिण कोरिया बरोबर रविवारी होत आहे. तसेच महिलांच्या वैयक्तिक रिकर्व्ह प्रकारात भारताच्या दीपिका कुमारीचा उपांत्य सामना दक्षिण कोरियाच्या स्पर्धका बरोबर होणार आहे.

वृत्तसंस्था/ लाहोर

2025 साली पाकचा क्रिकेट संघ न्यूझीलंडच्या दौरा करणार असल्याची अधिकृत माहिती पीसीबीच्या प्रवक्त्याने दिली आहे. या दौऱ्यामध्ये उभय संघात पाच सामन्यांची टी-20 आणि तीन सामन्यांची वनडे मालिका खेळविली जाणार आहे. पाक आणि न्यूझीलंड क्रिकेट मंडळाकडून या दौऱ्याबाबत अधिकृत हिरवा कंदिल दाखवण्यात आला आहे.

2023 नंतर उभय संघातील ही सहावी मालिका आहे. पीसीबीचे चेअरमन मोहसिन नक्वी आणि क्रिकेट न्यूझीलंडचे कार्यकारी संचालक स्कॉट विनिक यांची लाहोरमध्ये बैठक झाली आणि या बैठकीत या आगामी दौऱ्याला अधिकृत मंजुरी देण्यात आली. 2022-23 च्या कालावधीत न्यूझीलंड संघाने दोन वेळला पाकचा दौरा केला होता. या दौऱ्यात कसोटी आणि वनडे मालिका खेळविली होती. त्यानंतर गेल्या जानेवारीत पाकने न्यूझीलंडच्या दौऱ्यात पाच सामन्यांची टी-20 मालिका खेळली होती.

वृत्तसंस्था/ चेंगडु (चीन)

शनिवारपासून येथे सुरु झालेल्या विश्व बॅडमिंटन फेडरेशनच्या महिलांच्या उबेर चषक सांघिक आंतरराष्ट्रीय बॅडमिंटन स्पर्धेत भारताने कॅनडाचा 4-1 अशा फरकाने पराभव करत आपल्या मोहिमेला शानदार प्रारंभ केला.

भारत आणि कॅनडा यांच्यातील या लढतीमध्ये भारताची नवोदीत बॅडमिंटनपटू अस्मिता चलिहाने शानदार कामगिरीचे दर्शन घडविताना कॅनडाच्या अव्वल मिचेली ली चा एकेरीच्या सामन्यात 26-24, 24-22 अशा सरळ गेम्समध्ये पराभव केला. अस्मिताने हा सामना 42 मिनिटांमध्ये जिंकला. कॅनडाच्या ली ने 2014 आणि 2022 साली झालेल्या राष्ट्रकुल क्रीडा स्पर्धेत रौप्यपदक पटकाविले होते. त्यानंतर दुहेरीच्या सामन्यात भारताच्या के. प्रिया आणि श्रुती मिश्रा यांनी कॅनडाच्या कॅथरेनी चोई व जेसलीन चो यांचा 21-12, 21-10 असा पराभव करत आपल्या संघाला 2-0 अशी आघाडी मिळवून दिली. त्यानंतर एकेरीच्या सामन्यात भारताच्या इशरानी बारुआने कॅनडाच्या झेंगवर 21-13, 21-12 अशी मात केली. या विजयामुळे भारताने कॅनडावर 3-0 अशी विजयी आघाडी मिळविली होती. त्यानंतर महिलांच्या दुसऱ्या दुहेरीच्या सामन्यात कॅनडाच्या जॅकी डेंट व क्रिस्टल यांनी भारताच्या सिमरन सिंघी व रितीका ठक्कर यांचा 21-15, 21-11 असा पराभव केला. आता भारतीय महिला संघाचे अ गटातील पुढील सामने अनुक्रमे रविवारी आणि मंगळवारी सिंगापूर व चीन बरोबर होणार आहेत. तसेच थॉमस चषक पुरूषांच्या बॅडमिंटन स्पर्धेत भारताची सलामीची लढत थायलंड बरोबर होत आहे.

वृत्तसंस्था/ सिलेत

सध्या भारतीय महिला क्रिकेट संघ बांगलादेशच्या दौऱ्यावर गेला आहे. आता भारत आणि यजमान बांगलादेश महिला क्रिकेट संघामध्ये पाच सामन्यांची टी-20 मालिका खेळविली जाणार आहे. या मालिकेतील सर्व सामने सिलेतच्या आंतरराष्ट्रीय स्टेडियमवर खेळविले जातील.

गेल्या वर्षी भारतीय महिला संघाने बांगलादेशचा दौरा केला होता. या दौऱ्यात उभय संघात झालेली 3 सामन्यांची टी-20 मालिका भारताने 2-1 अशा फरकाने जिंकली होती. त्यानंतर उभय संघातील 3 सामन्यांची वनडे मालिका 1-1 अशी बरोबरीत राहिली होती. ही वनडे मालिका बांगलादेशने बरोबरीत सोडवली असल्याने या मालिकेतून पुन्हा बांगलादेशचा संघ नवी प्रेरणा घेण्यासाठी सज्ज झाला असल्याचे बांगलादेशची कर्णधार निगार सुल्तानाने म्हटले आहे.

मार्च-एप्रिल महिन्यात बांगलादेश महिला संघाला मायदेशामध्ये ऑस्ट्रेलिया विरुद्धच्या वनडे आणि टी-20 मालिका गमवावी लागली होती. या मालिकेनंतर बांगलादेश महिला संघ जोरदार सराव केला असून आता भारता विरुद्धच्या मालिकेत दर्जेदार कामगिरी करण्यासाठी सज्ज झाला आहे. आतापर्यंत भारत आणि बांगलादेश महिला संघामध्ये झालेल्या टी-20 मालिकांमध्ये बांगलादेशला एकही मालिका जिंकता आलेली नाही. भारत आणि बांगलादेश यांच्यातील ही टी-20 मालिका संपल्यानंतर येत्या जुलै महिन्यात लंकेत होणाऱ्या आशिया चषक महिलांच्या टी-20 स्पर्धेत बांगलादेशचा संघा सहभागी होणार आहे. येत्या सप्टेंबर महिन्यात आयसीसीची महिलांची टी-20 विश्वचषक क्रिकेट स्पर्धा भरविली जाणार आहे.

वृत्तसंस्था/ नवी दिल्ली

पुरूषांच्या विभागात मुरलीधरण सिनिमॉलने 01.02.03 असा कालावधी नोंदवित पहिले स्थान पटकाविले. पुरूषांच्या विभागात कौशिक मालंदेकरने दुसरे स्थान पटकाविले. कनिष्ठ पुरूषांच्या विभागात साई लोकेशने पहिले तर के. पटेलने दुसरे स्थान मिळविले.

महिलांच्या विभागात मानसी मोहितेने 01.07.23 असा कालावधी नोंदवित विजेतेपद मिळविले. कनिष्ठ महिलांच्या विभागात भारताच्या दुर्विशा पवारने पहिले तर प्रेरणा श्रावणकुमारने दुसरे स्थान घेतले.

आयपीएलमध्येही सर्वोच्च धावसंख्या केली चेस : केकेआरवर 8 गडी राखून दणदणीत विजय

वृत्तसंस्था/ कोलकाता

क्रिकेटमध्ये अशक्य काहीच नाही, या गोष्टीचा प्रत्यय पुन्हा एकदा आला. ईडन गार्डन स्टेडियमवर केकेआरने 261 धावांचा डोंगर उभा केल्यानंतर पंजाबला हे आव्हान पेलवणार नाही, असे वाटत होते. पण दोन सामन्यात बाहेर बसवल्यानंतर पुनरागमन करणाऱ्या जॉनी बेअरस्टो 48 चेंडूत नाबाद 108 व शशांक सिंग 28 चेंडूत नाबाद 68 धावा या जोरावर पंजाबने विजयी आव्हान 18.4 षटकांत पूर्ण करत दणदणीत विजय मिळवला. विशेष म्हणजे, कोणत्याही टी 20 स्पर्धेत धावांचा पाठलाग करतानाची ही सर्वोत्तम धावसंख्या आहे. याआधी, द.आफ्रिकेने विंडीजविरुद्ध 259 धावांचा यशस्वी पाठलाग केला होता. शुक्रवारी मात्र पंजाबने हा विक्रम स्वत:च्या नावे केला आहे.

केकेआरने दिलेल्या 262 धावांच्या आव्हानाचा पाठलाग करताना पंजाबकडून प्रभसिमरन आणि जॉनी बेअरस्टो यांनी वादळी सुरुवात केली. प्रभसिमरनने अवघ्या 20 चेंडूमध्ये 54 धावांची तुफानी खेळी साकारली. यामध्ये पाच षटकार आणि चार चौकारांचा समावेश होता. जॉनी बेयरस्टोने 48 चेंडूमध्ये नाबाद 108 धावांची आक्रमक खेळी केली. पाऊस पाडला. या खेळीत त्याने नऊ षटकार आणि आठ चौकार लगावले. पंजाबने पहिल्या विकेटसाठी 6 षटकांमध्ये 93 धावांचा पाऊस पाडला. प्रभसिमरन रन आऊट झाल्यानंतर रॉस्यू व बेअरस्टो यांच्यात 85 धावांची भागीदारी झाली. यादरम्यान, रॉस्यूने 16 चेंडूत 26 धावा केल्या.

बेअरस्टो, शशांकचा जलवा

प्रभसिमरन व रॉस्यू बाद झाल्यानंतर बेअरस्टो व शशांक सिंग यांनी केकेआरच्या गोलंदाजांची चांगलीच धुलाई केली. शशांक सिंगने पहिल्या चेंडूपासून एकामागोमाग एक षटकार लगावत धावगतीचं दडपण खाली आणलं. बेअरस्टोने 45 चेंडूत शतक साजरे केले. आयपीएलमधील बेअरस्टोचे हे दुसरे शतक आहे. शशांक सिंगने 28 चेंडूत 2 चौकार आणि 8 षटकारांसह नाबाद 68 धावा करत पंजाबच्या स्वप्नवत विजयावर शिक्कामोर्तब केलं. या जोडीने तिसऱ्या विकेटसाठी 37 चेंडूत 84 धावा कुटल्या.

केकेआरच्या पदरी निराशा

पंजाबचा कर्णधार सॅम करनने नाणेफेक जिंकून प्रथम गोलंदाजी करण्याचा निर्णय घेतला. केकेआरच्या सुनिल नरेन आणि फिल सॉल्ट जोडीने पहिल्या चेंडूपासूनच पंजाबच्या गोलंदाजांचा समाचार घेतला. या जोडीने पॉवरप्लेमध्येच 76 धावा केल्या. नरेनने 23 चेंडूत तर सॉल्टने 25 चेंडूत अर्धशतक झळकावले. या जोडीने 10.2 षटकात 138 धावांची भागिदारी केली. यंदाच्या हंगामातील ही सर्वात मोठी सलामीची भागिदारी ठरली. नरेनने 32 चेंडूमध्ये 71 धावांचा पाऊस पाडला. आपल्या वादळी खेळीमध्ये चार षटकार तर नऊ चौकार ठोकले. नरेनला राहुल चहरने बाद करत ही जोडी फोडली. नरेन बाद झाल्यानंतर सॉल्टनेही 37 चेंडूत 6 चौकार व 6 षटकारासह 75 धावांची तुफानी खेळी साकारली.

सलामीची जोडी बाद झाल्यानंतर आंद्रे रसेलने 12 चेंडूमध्ये 24 धावांची खेळी केली. तर श्रेयस अय्यरने 10 चेंडूमध्ये 28 धावा केल्या. या खेळीमध्ये श्रेयस अय्यरने तीन षटकार आणि एक चौकार ठोकला. रिंकू सिंह चार चेंडूत पाच धावा काढून बाद झाला. रमणदीप तीन चेंडूत सहा धावा काढून नाबाद राहिला. वेंकटेश अय्यरनं शेवटच्या चेंडूपर्यंत झुंज दिली वेंकटेश अय्यरने 23 चेंडूमध्ये 39 धावांची खेळी केली. या दमदार खेळीच्या जोरावर केकेआरने 20 षटकांत 6 गडी गमावत 261 धावांचा डोंगर उभा केला.

संक्षिप्त धावफलक :

केकेआर 20 षटकांत 6 बाद 261 (फिल सॉल्ट 75, सुनील नरेन 71, वेंकेटश अय्यर 39, आंद्रे रसेल 24, श्रेयस अय्यर 28, रमणदीप सिंग नाबाद 6, अर्शदीप सिंग 2 तर सॅम करन, हर्षल पटेल व राहुल चहर प्रत्येकी एक बळी).

पंजाब 18.4 षटकांत 2 बाद 262 (प्रभसिमरन सिंग 20 चेंडूत 54, बेअरस्टो 48 चेंडूत नाबाद 18, रॉस्यू 26, शशांक सिंग 28 चेंडूत नाबाद 68, सुनील नरेन एक बळी).

टी 20 क्रिकेटमधील सर्वोत्तम यशस्वी पाठलाग

आंतरराष्ट्रीय टी 20 सामन्यात दक्षिण आफ्रिकेने वेस्ट इंडिजविरुद्ध 259 धावांचा यशस्वी पाठलाग केला होता. हा विक्रम शुक्रवारी मोडीत निघाला आहे. टी 20 क्रिकेटच्या इतिहासातील हा सर्वात यशस्वी धावांचा पाठलाग ठरला आहे. पंजाबने 262 धावांचा यशस्वी पाठलाग केला आहे. तिसऱ्या क्रमांकावर मिडिलेक्स संघाचा क्रमांक लागतो. त्यांनी सरे संघाविरोधात 253 धावांचा यशस्वी पाठलाग केला होता. तर या यादीत चौथ्या क्रमांकावर ऑस्ट्रेलियाचा क्रमांक लागतो. ऑस्ट्रेलियाने न्यूझीलंडविरोधात 244 धावांचा यशस्वी पाठलाग केला होता.

40 षटकांत 523 धावांचा पाऊस, 37 चौकार व 42 षटकारांची आतषबाजी

शुक्रवारी ईडन गार्डन स्टेडियमवर कोलकाता आणि पंजाब सामन्यात चौकार आणि षटकारांचा पाऊस पहायला मिळाला. 40 षटकांमध्ये 523 धावांची आतषबाजी पहायला मिळघ्ली. या सामन्यात तब्बल 42 षटकार तर 37 चौकार लगावले गेले. विशेष म्हणजे, आयपीएलच्या इतिहासतील एखाद्या सामन्यातील हे सर्वाधिक षटकार आहेत.

वृत्तसंस्था/ नवी दिल्ली

रिषभ पंतचा फलंदाजीतील शानदार फॉर्म आणि प्रेरणादायी नेतृत्व यांच्या जारावर पुनरागमन केलेल्या दिल्ली कॅपिटल्सचा सामना आज शनिवारी येथे सातत्याच्या अभावाने ग्रासलेल्या मुंबई इंडियन्सशी होणार असून यावेळी आयपीएलच्या गुणतालिकेतील आपली झेप चालू ठेवण्याचे लक्ष्य दिल्लीसमोर असेल. कॅपिटल्सने आतापर्यंत संमिश्र हंगामाचा सामना केला आहे, ज्यामध्ये त्यांनी चमक दाखविली आहे, पण त्याचबरोबर त्यांना लाजिरवाण्या पराभवांनाही सामोरे जावे लागले आहे.

पण गेल्या चार सामन्यांतील तीन विजयांमुळे दिल्लीला सहाव्या स्थानावर जाण्यास मदत झाली आहे आणि मुंबई इंडियन्सविऊद्ध विजय मिळविल्यास त्यांचा ‘प्ले ऑफ’मधील स्थानावरचा दावा मजबूत होईल. दुसरीकडे, नेहमीप्रमाणे खराब सुऊवातीनंतर मुंबईने त्यांच्या पुढील चार सामन्यांमध्ये तीन विजय मिळवून पुनरागमन केलेले असले, तरी राजस्थान रॉयल्सने नऊ गडी राखून केलेल्या सर्वसमावेशक पराभवामुळे त्यांची विजयी घोडदौड संपुष्टात आली. ते आठव्या स्थानावर आहेत आणि त्यांना आणखी पराभव परवडणारे नाहीत.

दिल्लीसाठी सर्वांत मोठी सकारात्मक बाब कर्णधार पंतचा फॉर्म असून तो प्रत्येक सामन्यागिणक सुधारत असल्याचे दिसून येते. यष्टिरक्षक म्हणूनही त्याची कामगिरी चांगली झाली आहे. बुधवारी गुजरात टायटन्सविऊद्धच्या सामन्यात विजय मिळवून देणारी नाबाद खेळी करताना तो त्याच्या नेहमीच्या लढाऊ स्वरुपात दिसला. संजू सॅमसन, दिनेश कार्तिक आणि इशान किशन हे दावेदार असूनही टी-20 विश्वचषकासाठीच्या भारतीय संघात स्थान मिळविण्याच्या शर्यतीत पंत आघाडीवर आहे असे असेच म्हणावे लागेल.

जॅक फ्रेझर-मॅकगर्कमध्ये दिल्लीला वरच्या फळीतील एक सक्षम फलंदाज सापडला आहे, जो पॉवरप्लेचा फायदा घेऊ शकतो. परंतु सलामीवीर पृथ्वी शॉकडून अधिक अपेक्षा आहेत. डेव्हिड वॉर्नरने मागील सामना गमावून शाई होपसाठी मार्ग मोकळा केला होता. पण होप त्या संधीचा फायदा घेऊ शकला नाही आणि अनुभवी ऑस्ट्रेलियन खेळाडूला संघात परत आणले जाऊ शकते. ट्रिस्टन स्टब्सने तो किती आक्रमक होऊ शकतो ते वेळोवेळी सिद्ध केले आहे. अक्षर पटेलने देखील गुजरातविरुद्ध आपले फलंदाजीचे कौशल्य दाखवले.

कुलदीप यादव आणि अक्षर या फिरकी जोडीने फारशा धावा दिलेल्या नसल्या, तरी दिल्लीच्या वेगवान गोलंदाजी विभागाने चांगली कामगिरी करण्याची गरज आहे. वेगवान गोलंदाज एन्रिक नॉर्टजेने सरासरी षटकामागे 13.36 धावा दिल्ला असून ती दिल्लीसाठी एक मोठी समस्या आहे. खलील अहमद, मुकेश कुमार आणि इशांत शर्मा या खेळाडूंना दुखापतींनी ग्रासले आहे, ज्यामुळे त्यांची कामगिरी सातत्यपूर्ण राहिलेली नाही. मोसमाच्या आरंभी मुंबईने त्यांच्याविरुद्ध 5 बाद 234 धावा काढल्या होत्या. त्यामुळे दिल्लीला आज सतर्क राहावे लागेल.

या हंगामात मुंबईच्या पुनगरामनाची सुऊवात दिल्लीविऊद्धच्या विजयाने झाली आणि पाच वेळचे विजेते आजच्या महत्त्वपूर्ण लढतीत त्याचीच पुनरावृत्ती घडविण्याची आशा बाळगून असतील. मुंबईसाठी रोहित शर्मा, सूर्यकुमार यादव आणि तिलक वर्मा यांनी धावा केल्या आहेत, परंतु या फॉर्ममध्ये सातत्य दिसून आलेले नाही. टीम डेव्हिड, इशान किशन आणि कर्णधार हार्दिक पंड्या या त्रिकूटावर मोठे योगदान देण्याचा दबाव असेल. जसप्रीत बुमराह हा मुंबईचा उत्कृष्ट गोलंदाज राहिला असून त्याने 13 बळी मिळविले आहेत. गेराल्ड कोएत्झीने धावा दिल्या असल्या, तरी आठ सामन्यांत 12 बळी घेतले आहेत. पण हे दोन वेगवान गोलंदाज वगळता मुंबईच्या गोलंदाजीने निराशा केली आहे.

सामन्याची वेळ : सायंकाळी 7.30 वा.

वृत्तसंस्था/ लखनौ

राजस्थान रॉयल्स आज शनिवारी होणार असलेल्या आयपीएलच्या सामन्यात घरच्या मैदानावर बदला घेण्याच्या प्रयत्नात असलेल्या लखनौ सुपर जायंट्सशी पुन्हा एकदा सामना करणार आहे. यावेळी आपल्या विजयाची गती कायम ठेवण्याचा आणि आपले स्थान बळकट करण्याचा प्रयत्न राजस्थान करेल. माजी विजेता राजस्थान या मोसमात आठ सामन्यांतून सात विजयांसह जबरदस्त फॉर्ममध्ये दिसत आहे आणि एलएसजीला त्यांचे आव्हान जड जाऊ शकते.

लखनौ देखील चांगले क्रिकेट खेळला आहे आणि आठ सामन्यांतून पाच विजयांसह चौथ्या स्थानावर आहे. पण आजच्या सामन्यात राजस्थानचे पारडे जड असेल. कारण त्यांनी गुजरात टायटन्सविऊद्धच्या पराभवानंतर विजयाची हॅट्ट्रिक नोंदवली आहे. आसामचा फलंदाज रियान पराग हा फलंदाजी विभागात त्यांना गवसलेला नवा तारा ठरला आहे. आठ सामन्यांतून 318 धावा करून तो संघाचा सर्वाधिक धावा करणारा खेळाडू ठरला आहे.

यंदाच्या मोसमात थोडा संघर्ष करावा लागलेला यशस्वी जैस्वाल फॉर्ममध्ये परतल्याने राजस्थानची फलंदाजी आणखी मजबूत झाली आहे. तो आणि जोस बटलर आघाडीला येऊन विलक्षण धडाका लावू शकतात. राजस्थानची फलंदाजी सामान्यत: कर्णधार संजू सॅमसनच्या भोवती फिरते, ज्याने आतापर्यंत 314 धावा केल्या आहेत. वेस्ट इंडिजचा शिमरॉन हेटमायर देखील चांगली फटकेबाजी करू शकतो. मात्र रोव्हमन पॉवेल आणि ध्रुव जुरेल यांनी अधिक योगदान देण्याची गरज आहे.

अनुभवी ट्रेंट बोल्ट, आवेश खान आणि संदीप शर्मा यांच्या रूपाने त्यांच्याकडे प्रभावी वेगवान मारा आहे. संघाचा फिरकी विभाग देखील युजवेंद्र चहल आणि आर. अश्विन ही अनुभवी जोडी सांभाळत आहे. जरी चहलला या हंगामात संघर्ष करावा लागलेला असला, तरी आठ सामन्यांतू 13 बळींसह तो राजस्थानचा सर्वोत्तम गोलंदाज ठरला आहे. दुसरीकडे, एलएसजी या मोसमातील पहिल्या सामन्यात राजस्थानकडून 20 धावांनी पराभूत झाल्यानंतर त्याचा बदला घेण्यास उत्सुक असेल. सलग दोन विजयांमुळे के. एल. राहुलचा संघ देखील उत्साहात आहे.

राहुल आणि त्याचा सलामीचा जोडीदार क्विंटन डी कॉक फॉर्ममध्ये असून चेन्नई सुपर किंग्जविऊद्धच्या मागील सामन्यात मार्कस स्टॉइनिसने नाबाद शतक झळकावले. स्टॉइनिसचे पुनरागमन एलएसजीच्या मधल्या फळीसाठी दिलासादायक आहे. तिथे देवदत्त पडिक्कल, निकोलस पूरन आणि दीपक हुडा या खेळाडूंनी अधिक जबाबदारी स्वीकारण्याची गरज आहे. गोलंदाजीच्या आघाडीवर वेगवान गोलंदाज मयंक यादव दुखापतीमुळे काही सामने बाहेर बसल्यानंतर आज खेळेल, अशी आशा लखनौ बाळगून असेल.